Heklaðar buxur

 

Frænka mín bað mig að hekla á sig buxur í líkingu við þær sem hún hafði séð á TikTok og auðvitað varð ég við því þrátt fyrir að mér þættu þær ekki fallegar... ekki frekar en Harry Styles peysan sem hún slefar yfir. Ég hafði ekki gert neitt í höndunum í langan tíma og þetta var bara gaman og mér þykir þær hafa komið rosalega vel út og mun fallegri en ég bjóst við að þær yrðu 

Maður hafði svo sem ekkert til að styðjast við og smá vesen að finna hvernig væri best að gera þetta þar sem maður þarf að láta ömmuferningana passa sem best og ekkert hægt að bæta smá við hér og þar. Ég taldi best að hafa hanka á buxunum og band og það væri þá hægt að skipta því út fyrir belti síðar ef hún vill.

Ég held bara að þetta hafi tekist vel upp hjá mér en eina sem ég lenti í var að buxurnar síkkuðu talsvert eftir þvottinn þannig að það er ein röð af ferningum sem ég faldaði inn á... það er þá amk hægt að síkka þær aftur ef þær styttast í næsta þvotti 😆

Garn: Kambgarn
Heklunál: 3,5 mm
Uppskrift: engin

Annað heklað vintage teppi

Munið þið eftir heklaða vintage teppinu sem ég kláraði í byrjun árs 2013? Það var heklað úr einföldum plötulopa og úr mörgum litum sem var raðað af handahófi. Það var svo gaman að hekla það að ég byrjaði á öðru í júlí sama ár en nú úr tvöföldum plötulopa og ég ætlaði að nota það í hjólhýsinu sem ég átti... en þar var litaþemað appelsínugult :)

Ég var rosalega dugleg að hekla í útilegunum og kláraði það næstum því... nema að ég gat ekki ákveðið hvernig kant ég vildi hafa á því. Svo dagaði það bara uppi eins oft vill verða.

Svo var mamma að segja mér að ömmu minni vantaði ullarteppi og þá mundi ég eftir teppinu og bara heklaði kant á það þvoði það og gaf henni það en nú á ég nýtt hjólhýsi sem er ekki með neinu appelsínugulu í... verð bara að hekla annað fyrir það! 😄

Ég mældi það ekki en það er risastórt enda hafði ég hugsað mér að það væri hægt að nota það sem rúmteppi í hjólhýsinu... fallegt teppi sem bara passar ekki í litaþemað heima hjá mér og bara æðislegt ef amma mín getur notað það til að ylja sér 💖

Ég hlakka bara til að fara að hekla annað og ætla ekki að láta það taka meira en 6 ár að klára!

Garn: tvöfaldur plötulopi
Heklunál: 8,0 mm
Uppskrift: engin en þið getið lesið um hvað er í líkingu við það á hinu teppinu.

Hekluð gardína

Ég átti víst alltaf eftir að blogga um eldhúsgardínuna mína sem tók nokkur ár að hekla reyndar með löngum hléum... en ég var reyndar búin að pósta mynd á Facebook síðunni í nóvember 😉

Ég flutti fyrir 5 árum og var staðráðin í að hekla mér eldhúsgardínu og hafði verið búin að kaupa gardínublað einhverju áður og hófst handa reyndar tæpu ári eftir að ég flutti eða í janúar 2015 (sé það inni á Ravelry sem er snilld til að halda utan um alla hluti).

Þar sem mér leiðist afskaplega að vera endalaust að gera það sama þá kastaði ég þessu verkefni ansi oft frá mér og að lokum bara gleymdist það inni í skáp. Ég rakst svo á þetta aftur í október í fyrra og fletti upp hvenær ég hefði byrjað á því og þá ákvað ég að nú væri kominn tími á að klára og láta ekki enn fleiri ár líða 😂 Ég sá að það var mjög lítið eftir þannig að ég sat stíft við til að klára og upp skyldu gardínunar fyrir jól... það gerðist en ég reyndar uppskar geðveika vöðvabólgu í kjölfarið 😏

Það var pínu mál að strekkja gardínuna þar sem hún er svo löng en ekkert mál með góðum græjum 😁 Ég keypti þessa mottu á bland.is á sínum tíma og strekkivírana í Handprjón og hef sko notað þá mikið. Eina sem ég áttaði mig ekki á var hve gardínan lengdist mikið við strekkingu en ég gerði alveg ráð fyrir smá en þetta var mun meira en ég bjóst við svo að þá varð bara smá rykking/fellingar á gardínunni í glugganum.

Garn: Solberg Garn 12/4 Mercerisert
Heklunál: 1,75 mm
Uppskrift: Kafégardin med spindler úr Solberg hefte nr. 48

Undurfagurt ungbarnateppi #2

Ég heklaði þetta teppi fyrir nokkuð löngu síðan en átti alltaf eftir að þvo það og strekkja. Ég var að bíða eftir að lítill strákur myndi fæðast í kringum mig en mér þykir mjög gott að eiga ungbarnateppi á lager svo að maður sé ekkert í stressi að hekla 😃

Ég fékk loksins tækifæri til að hitta litla manninn í dag og því get ég loksins bloggað um þetta... en ég sé að það er komið meira en ár síðan ég bloggaði síðast... svo að ég get líka óskað ykkur gleðilegs árs 😜

Þetta er í annað sinn sem ég hekla þetta teppi en þið getið skoðað það fyrra hér. Mér finnst þetta enn vera fallegasta ungbarnateppið en ég á alltaf í smá vandræðum með kantinn... mynstrið er smá snúið í upphafi en svo þegar maður fattar það þá er þetta ekkert mál 😉

Garn: King Cole Cottonsoft
Heklunál: 5,5 mm
Uppskrift: http://www.ravelry.com/patterns/library/mayflower-baby-blanket

Ljósmóðurteppið #2

Vá þetta er fyrsta bloggfærsla ársins. Ég hef lítið verið í að föndra á árinu enda komin með nýtt áhugamál sem er búið að eiga hug minn allan... en það er ég sjálf en ég ákvað í byrjun þessa árs að breyta um lífstíl :) Hvað um það þá er ég samt ekkert hætt í handavinnunni heldur bara afkasta ég mun minna en ég hef gert áður.

Mér finnst nauðsynlegt að hafa eitthvað í höndunum þegar ég horfi á sjónvarpið og því ákvað ég að skella í eitt ljósmóðursteppi en ég hafði áður gert eitt slíkt. Ég hafði séð teppi þar sem búið var að þræða silkiborða í slíkt og ákvað ég því að gera eitt slíkt.

Það er ótrúlega fljótlegt að hekla þetta teppi og ætli ég bara endi ekki með lager ef ég finn mér ekki eitthvað annað til að hekla... en það er ótrúlegt hvað silkiborðinn setur mikinn svip á teppið að mér finnst ;)

Kantinn ætlaði ég að gera úr bókinni Around the Corner - Crochet Borders eftir Edie Eckman en hætti svo við að halda áfram þegar ég var búin með fyrstu umferðina því að mér fannst þetta bara vera nóg :)

Garn: King Cole Big Value Baby DK
Heklunál: 4,0 mm
Uppskrift: http://littlemonkeyscrochet.com/call-the-midwife-inspired-baby-blanket-free-pattern/

Salmon Glacier Snowflake

Þriðja snjókornið er tilbúið og ég náði að smella mynd af því í smá dagsbirtu... en birtuskilyrðin fyrir myndatökur eru ekki góðar á þessum árstíma þannig að stundum þarf maður bara að vera þolinmóður ;)

Ég persónulega er ekkert sérstaklega hrifin af þessu snjókorni og fannst ekki gaman að strekkja það... kannski er það bara fullkomnunaráráttan að hrjá mann... en ekki misskilja mig að mér finnist það ljótt en ég hef bara gert svo mörg önnur flottari ;)

*fliss* ég sé núna þegar ég er að blogga að ég hef greinilega ekki skoðað myndina sem er í uppskriftinni þegar ég var að strekkja... því að mitt lítur allt öðruvísi út því að ég strekkti það greinilega öðruvísi... það liggur við að ég bleyti það og strekki upp á nýtt... hvað finnst ykkur?

Garn: DMC Babylo size 10
Heklunál: 1,5 mm
Uppskrift: https://snowflakepatterns.wordpress.com/salmon-glacier-snowflake/

Mill Creek Snowflake

Þetta snjókorn heklaði ég líka í september og stífði það loksins á laugardaginn. Þetta snjókorn er eftir sama hönnuð og ég mæli með því að þið kíkið á síðuna hennar... snjókornin hennar eru hvert öðru fallegra og ég skil ekki hvernig hún nær að afkasta svona miklu :)

Ég lenti í svolitlum vandræðum með þessa uppskrift og fékk hana ekki til að ganga upp... eftir smá höfuðverk fann ég út úr þessu amk gekk þetta upp hjá mér. Ef þið ætlið að hekla þetta snjókorn og lendið í vandræðum þá getið þið kíkt á punktana mína á "projectinu" inn á Ravelry. Engu að síður er þetta gullfallegt snjókorn en dálítið í stærri kantinum ;)

Garn: DMC Babylo size 10
Heklunál: 1,5 mm
Uppskrift: http://www.snowcatcher.net/2016/02/snowflake-tuesday.html

Big Top Snowflake

Heklaði þetta snjókorn í september en dreif mig loksins í að stífa það í gærkvöldi. Fallegt snjókorn úr smiðju Deborah Atkinson. Frekar auðvelt að stífa það en ég var á báðum áttum með hvort að ég ætti að hafa það oddhvassara en ákvað að stífa það eins og Deborah gerði :)

Ef þið gerið þetta snjókorn þá fannst mér vera smávægileg villa í uppskriftinni en þið getið lesið um það í punktum mínum inn á Ravelry.

Garn: DMC Babylo size 10
Heklunál: 1,5 mm
Uppskrift: http://www.snowcatcher.net/2016/01/snowflake-sunday.html

Maia sjalið mitt

Ég er rosalega skotin í nýjasta sjalinu mínu... finnst það svo fallegt. Eins og ég hef áður sagt þá er Lisa Naskrent (crochetgarden.com) uppáhalds sjalahönnuðurinn minn og þetta er einmitt eftir hana. Ég hef heklað nokkur sjöl eftir hana og á örugglega eftir að hekla fleiri :)

Ég ákvað að hekla þetta sjal úr garni sem ég átti í "hrúgunni" minni en ég hafði fengið manninn minn til að bera það heim frá Ameríku fyrir nokkrum árum. Ég reyndar verð að viðurkenna að ég persónulega er hrifnari í dag af einlitu garni en ég átti þetta bara til og því notaði ég það ;)

Garnið er frá Knitpicks og heitir Shimmer en það er hætt framleiðslu á því. Garnið er yndislega mjúkt en það er 70% úr Baby Alpaca og 30% silki og er handlitað.

Það gekk vel að hekla sjalið en eins og svo oft áður þá dugði garnið ekki í fyrstu tilraun en ég sá það á næst síðustu umferðinni... þannig að ég þurfti að rekja meira en 1/3 af sjalinu upp til að hætta fyrr í fyrsta mynstrinu... en það er svo gaman að hekla að það gerði ekkert til ;) Ég myndi reyndar aldrei hugsa svona ef sjalið væri prjónað því að það er ofar mínum skilningi hvernig það er hægt að rekja upp margar umferðir (ekki nema með hjálparlínum) og er ég nú með eitt hálf prjónað sjal sem ég fékk ekki til að ganga upp og ég held bara að ég reki það upp og hekli úr garninu frekar!

Sjalið stækkaði mikið þegar ég strekkti það og varð svo miklu fallegra fyrir vikið þar sem mynstrið opnaði sig svo vel. Ég tel að það sé fallegra að hafa stærri nál en minni ef maður sé maður í vafa hvort að maður eigi að hækka upp eða lækka niður í númeri ;) Ég snappaði sjalaþvottinn og strekkinguna frá A-Ö eins og þeir sem fylgja mér á Snapchat (notandanafnið mitt er fondrari) hafa sennilega séð en ég vistaði söguna og þið getið séð hana hér:
https://www.facebook.com/Fondrari/videos/1095410463885944/

Flottustu sjölin sem ég hef heklað að mínu mati eru eftir Lisa Naskrent og eru hérna í þeirri tímaröð sem ég gerði þau:

    

    

Ég er ekki nógu ánægð með myndina af sjalinu útbreiddu og ætlaði að reyna að taka betri myndir en ég nenni ekki að bíða lengur með að blogga um þetta svo að þessar myndir verða bara að duga ;)

Garn: Knit Picks Shimmer Hand Dyed Lace Yarn
Heklunál: 4,5 mm
Uppskrift: http://www.ravelry.com/patterns/library/maia-shawl

Gleðilega páska!

Ég elska að skreyta fyrir jólin og páskana... mér finnst alltaf svo gaman að fá gula litinn inn með litlu páskaliljunum, gulum túlípönum, gulum kertum og föndraða páskaskrautinu frá ömmu :) Reyndar að þessu sinni var ég búin að hekla utan um nokkur egg en það er einmitt tilefni bloggfærslunnar í dag.... varð reyndar að smella einni mynd af krukkubakkanum mínum um páskana :)

En já aftur að hekluðu páskaeggjunum... hérna sjást þau öll saman á greininni minni. Amma gerði litlu fuglana fyrir ansi mörgum árum síðan og mér finnst þeir alltaf jafn sætir :)

Ég setti inn uppskriftina mína af "skeljapáskaegginu" í gær og vonandi eiga einhverjir eftir að nýta sér hana. En ég átti eftir að blogga um hin tvö eggin sem ég heklaði utan um eftir uppskriftum sem ég fann á netinu.

Það var mjög gaman að hekla eggin en ég þurfti að aðlaga uppskriftirnar svolítið. Fyrsta eggið sem ég gerði var netaeggið.

Uppskriftin var mynsturteikning og maður heklaði tvo helminga en svo fannst mér ekki segja mikið frá því hvernig maður átti að tengja þá saman... ég bætti því við einni umferð þar sem ég tengdi stykkin saman.

Svo var það seinna eggið en þarna var ég ekki nógu hrifin af uppskriftinni því að það var ekki fallegt á bakhliðinni því að þetta var svona svipað og þegar verið er að hekla utan um steina en þá var bara op á bakhliðinni... ég ákvað því að hekla tvö svona hjól og tengja saman á hliðinni í kross.

Ég á örugglega eftir að hekla fleiri egg í framtíðinni og þá held ég að ég væri til í að mála eggin... gæti alveg séð þau fyrir mér ljósbleik eða ljósgrá með hvítu heklugarni :)

Garn: DMC Babylo heklugarn nr. 10
Heklunál: 1,5 mm
Uppskriftir: http://www.fondrari.blogspot.is/2016/03/hekla-paskaegg-uppskrift.html,
http://lvly.nl/en/crochet-easter-eggs-pattern/ og http://www.flaxandtwine.com/2012/04/crochet-covered-easter-eggs-a-diy-tutorial/

Heklað páskaegg - uppskrift

Ég er föndrari af lífi og sál eins og nafn bloggsins gefur til kynna og fyrir ansi mörgum árum dundaði ég mér við að blása úr eggjum sem ég svo málaði og skreytti fyrir páska. Þið getið séð myndir sem ég tók af þeim hér. Mig langaði því til að prófa að hekla utan um egg sem ég væri búin að blása úr. Ég rakst á nokkrar uppskriftir á netinu og prófaði að hekla tvö sem voru mjög sæt (sýni ykkur þau von bráðar) en svo langaði mig til að hekla bara upp úr mér með Skeljakrukku mynstrinu.

Ég var mjög ánægð með útkomuna og ákvað að hekla utan um annað egg og skrifa uppskriftina niður og gefa ykkur í tilefni páskanna :) Ég komst að því að egg eru mjög mismunandi að stærð og því var seinna eggið mun stærra en hið fyrra. Þið gætuð því þurft að aðlaga uppskriftina að egginu sem þið eruð að hekla utan um hverju sinni.

| Fleiri uppskriftir | English version  | 

Heklað páskaegg

Ekki afrita og dreifa uppskriftinni sjálfri en þið megið að sjálfsögðu deila linknum á uppskriftina að vild.

Efni og áhöld:
1,5 mm heklunál,
Heklugarn nr. 10,
1 hænuegg.

Skammstafanir:
ll = loftlykkja,
kl = keðjulykkja,
fl = fastalykkja,
st = stuðull,
llb = loftlykkjubogi,
L = Lykkja,
umf = umferð,
2hstsam = úrtaka, fara með nálina í næstu L og ná í bandið, slá bandinu upp á og fara með nálina í næstu L og ná í bandið, slá bandinu upp á og fara í gegnum allar 4 L á nálinni.

Athugið í byrjun umferðar gerið þá 3 ll í staðinn fyrir st.

Aðferð:
Skolið eggið og þurrkið. Blásið úr egginu en það er gert með því að gera gat á breiðari enda eggsins með grófri nál eða títuprjóni, stingið nokkrum sinnum þannig að gatið verði ca 2-3 mm í radíus, gerið svo annað gat að ofanverðu en hafið það minna. Passið að það komi ekki sprunga í eggið því að ef það gerist þá fáið þið allt gumsið framan í ykkur. Blásið því næst í minna gatið yfir skál og þá ætti eggjahvítan og svo rauðan að leka út úr egginu. Skolið vel og látið þorna.

Þegar eggið er orðið þurrt þá er hægt að fara að hekla utan um það en athugið að eggið er að sjálfsögðu viðkvæmt þannig að þið þurfið að fara blíðum höndum um það :) Þið getið málað eggið áður eða einfaldlega heklað utan um það með heklugarni sem er ekki samlitt. Ég notaði stór brún vistvæn egg og hvítt heklugarn.

Heklað utan um egg:
Gerið galdralykkju (magic ring).
1. umf: 20 stuðlar í hringinn. Dragið galdralykkjuna saman, kl í fyrsta st.
2. umf: *st, ll, hopppa yfir næstu L, (2 st, ll, 2 st) í næstu L, ll, hoppa yfir næstu L*, endurtaka það sem er á milli * * 4 sinnum til viðbótar, kl í 3. ll í upphafi umf. (samtals 5 stuðlahópar og 5 stuðlar).
3. umf: *st í st frá fyrri umf, 2 ll, (2 st, ll, 2 st) í gatið á milli stuðlahópanna, 2 ll*, endurtakið það sem er á milli * * út umf, kl í 3. ll í upphafi umf.
4. umf: *st, 2 ll, (3 st, ll, 3 st) í gatið á milli stuðlahópanna, 2 ll*, endurtakið það sem er á milli * * út umf, kl í 3. ll í upphafi umf.
5. umf: *st, 3 ll, (3 st, ll, 3 st) í gatið á milli stuðlahópanna, 3 ll*, endurtakið það sem er á milli * * út umf, kl í 3. ll í upphafi umf.
6. umf: eins og 4. umf.
7. umf: eins og 4. umf (þið gætuð þurft að sleppa þessari umf ef eggið er minna).
8. umf: *st, ll, (3 st, ll, 3 st) í gatið á milli stuðlahópanna, ll*, endurtakið það sem er á milli * * út umf, kl í 3. ll í upphafi umf.
9. umf: eins og 8. umf (þið gætuð þurft að sleppa þessari umf ef eggið er minna).
10. umf: eins og 2. umf. Þarna þurfti ég að setja eggið inn í stykkið áður en ég kláraði umferðina. Gott að ganga frá upphafsendanum áður.
11. umf: *st í næsta st, 2 ll, fl í gatið á milli stuðlahópanna, 2 ll*, endurtakið það sem er á milli * * út umf, kl í 3. ll í upphafi umf.
12. umf: ll, *2 fl í llb, hoppa yfir fl, 2 fl í llb, hoppa yfir st*, endurtakið það sem er á milli * * út umf, tengið með kl í ll í upphafi umf.
13. umf: ll, 2hstsam út umf, tengið með kl. Endið á því að gera 2-3 ll og tengið með kl þvert yfir opið en þetta nota ég sem upphengilykkju sem ég festi skrautborða í til að geta hengt eggið upp. Klippið og gangið frá enda.

© Ólöf Lilja Eyþórsdóttir - það má ekki afrita uppskriftina á neinn máta án míns samþykkis.

Hér er svo linkur á uppskriftina á Ravlery fyrir þau ykkar sem eru þar:

http://www.ravelry.com/patterns/library/easter-egg-15

Gleðilegt ár

Ég ætla bara að setja mér það markmið að klára nokkur ókláruð stykki á árinu... þar má m.a. finna prjónað sjal, heklað teppi, heklað ungbarnateppi og heklaðar eldhúsgardínur :)

En póstur dagsins er heklað snjókorn sem ég sá á Ravelry að ég hafði aldrei tekið mynd af... þar sem ég er byrjuð að pakka niður jólunum þá var ekki úr vegi að smella mynd af því. Þetta er gullfallegt snjókorn úr smiðju Deborah Atkinson og heitir Savanna Snowflake. Ég kláraði það 21. september 2014 en ég man ekki hvort að ég gerði tvö en í skýringunum við snjókornið skrifaði ég að ég ætlaði að hekla annað með 1,5 mm heklunál og að ég hefði notað 1,25 mm... þannig veit ég ekki hvor heklunálin var notuð í verkið.

Garn: DMC Babylo size 10
Heklunál: 1,25 mm eða 1,5 mm
Uppskrift: http://www.snowcatcher.net/2014/06/snowflake-monday.html

Ljósmóðurteppið

Loksins get ég bloggað um ljósmóðurteppið eða The Midwife blanket, sem ég heklaði í síðasta mánuði handa litlum krúttmola, þar sem ég gaf það í dag :) Ég er sem sagt ekki alveg bara að hekla snjókorn og jólaskraut... þó að það sé bjölluframleiðsla í gangi þessa dagana ;)

Það var svakalega gaman að hekla þetta teppi og uppskriftin mjög auðveld og góð... eða kannski þar til kom að kantinum en mér fannst hann ekki koma alveg nógu vel út... þannig að ég gerði bara mína útgáfu að kanti. Ég gæti alveg hugsað mér að hekla fleiri svona og jafnvel prófa að hekla úr mjúku akrýlgarni.

Ég gerði 10 x 17 ferninga og teppið varð ca 84 x 113 cm að stærð... sem mér fannst ágæt stærð en auðvitað er þetta smekksatriði... en ég hef heklað teppi sem mér fannst vera of lítil og vildi ekki hætta á það... held að það sé mun betra að hafa þau of stór en of lítil ;)

Garn: Kambgarn
Heklunál: 3,5 mm
Uppskrift: http://littlemonkeyscrochet.com/call-the-midwife-inspired-baby-blanket-free-pattern/

Arininn með hekluðum snjókornum og grýlukertum

Ég ákvað að sýna ykkur mynd af arninum þar sem sést vel hvernig snjókornin og grýlukertin hanga í greninu sem ég hengdi á hann.

Uppskriftina af grýlukertunum má finna hér:
http://goo.gl/oI8oSK

Uppskriftina af snjókornunum má finna hér:
http://goo.gl/M0W3Y3

Það getur samt vel verið að ég muni breyta einhverju því að ég er enn að velkjast í vafa með hvort að ég eigi að setja smá pínu skraut á jólatréð :)

Hekluð grýlukerti - frí uppskrift

| Fleiri uppskriftir | English version  |

Hekluð grýlukerti

Ég var búin að sjá svo falleg grýlukerti á Pinterest en fann enga uppskrift þannig að ég bara gerði mína eigin... þetta er mjög einfalt en ég ákvað samt að skrifa hana niður svo að fleiri gætu notið hennar :)

Ekki afrita og dreifa uppskriftinni sjálfri en þið megið að sjálfsögðu deila linknum á uppskriftina að vild.

Efni og áhöld:

1,5 mm heklunál

Solberg 12/4 Mercerisert

Skammstafanir:

ll = loftlykkja,

kl = keðjulykkja,

tbst = tvöfaldur stuðull,

llb = loftlykkjubogi

L = lykkja,

umf = umferð.

Athugið að í byrjun umferðar gerið 4 ll í staðinn fyrir fyrsta tbst. Í lok hverrar umf er stykkinu snúið við.

Aðferð: 

10 ll, tengja í hring með kl. 

1. umf: kl utan um hringinn, 6 tbst í hringinn, 6 ll, 6 tbst í hringinn.

2. umf: kl í hverja L að llb og í llb, 6 tbst í llb, 5 ll, 6 tbst í llb.

3. umf: kl í hverja L að llb og í llb, 5 tbst í llb, 5 ll, 5 tbst í llb.

4. umf: kl í hverja L að llb og í llb, 5 tbst í llb, 4 ll, 5 tbst í llb.

5. umf: kl í hverja L að llb og í llb, 4 tbst í llb, 4 ll, 4 tbst í llb.

6. umf: kl í hverja L að llb og í llb, 4 tbst í llb, 3 ll, 4 tbst í llb.

7. umf: kl í hverja L að llb og í llb, 3 tbst í llb, 3 ll, 3 tbst í llb.

8. umf: kl í hverja L að llb og í llb, 3 tbst í llb, 2 ll, 3 tbst í llb.

9. umf: kl í hverja L að llb og í llb, 2 tbst í llb, 2 ll, 2 tbst í llb.

10. umf: kl í hverja L að llb og í llb, 2 tbst í llb, 1 ll, 2 tbst í llb.

11. umf: kl í hverja L að llb og í llb, 2 tbst í llb.

12. umf: kl á milli tbst í umf á undan, 4 ll.

Minni útgáfan mín er gerð þannig að ég geri bara eina umf af hverjum fjölda af tbst eða 6 tbst, 5 ll, 6 tbst, 5 tbst, 4 ll, 5 tbst osfrv.

Klippið og gangið frá endum. Ég stífði mín upp úr sykurvatni  (leysi upp í jöfnum hlutföllum strásykur og sjóðandi vatn) og pinnaði þau niður á frauðplast með smjörpappír á milli.

© Ólöf Lilja Eyþórsdóttir - það má ekki afrita uppskriftina á neinn máta án míns samþykkis.

Hér er svo linkur á uppskriftina á Ravlery fyrir þau ykkar sem eru þar:
http://www.ravelry.com/patterns/library/crochet-icicles

Heklaður poki

Ég er aðeins byrjuð að skreyta fyrir jólin... ég vil vera búin að setja upp ljósin svolítið snemma til að njóta lengur... jólatréð kemur samt ekki upp fyrr en á Þorláksmessu eða nokkrum dögum fyrr ;)

Ég keypti lítið sætt jólatré í IKEA sem ég ætlaði að setja á arininn en ég er búin að vandræðast með í hvernig pott ég gæti sett það. Ég keypti blómapott í IKEA en mér finnst þetta ekki alveg vera að gera sig.

Ég ætla að vera með hvítt heklþema aftur í ár... já vel á minnst ég þarf að fara að drífa mig í að hekla fleiri bjöllur til að setja á seríur til að setja í glugga og á jólatréð... en það er vonandi nægur tími til stefnu.. en já þar sem ég er með hvítt heklþema þá ákvað ég að hekla poka utan um jólatrésfótinn eða pottinn.

Ég er bara nokkuð sátt... kannski er hann aðeins of stór en það er þó betra en að hann væri aðeins of lítill... finnst þetta amk mun flottara en venjulegur blómapottur :)

Garn: King Cole Cottonsoft
Heklunál: 4,0 mm
Uppskrift: engin

Heklað hjarta

Hér kemur eitt sem ég heklaði í janúar en var loksins að stífa það um leið og ég gerði snjókornið :) Reyndar á ég tvö svona og ég hafði ákveðið að hengja þau í gluggann í stofunni og hengja kristal í þau... en ég er aðeins að melta þetta... en ég er þó amk búin að stífa þau ;) Stærðin er ca. 28,5 x 28 cm.

Ég reyndar heklaði fleiri en tvö... það fyrsta var úr DMC Babylo nr. 10 og notaði ég 1,75 mm heklunál en mér þótti það vera of lítið... næsta sem ég heklaði var eins og þessi nema ég ákvað að prófa að stífa það með útþynntu trélími... auðvitað tímdi ég ekki að nota títuprjónana mína í límið og fór og keypti nýja en gat ekki séð á umbúðunum hvort að þeir væru ryðfríir eða ekki... óþolinmóða ég gat auðvitað ekki gert prufu og auðvitað voru þeir ekki ryðfríir... það hjarta fór því í ruslið reyndar ekki fyrr en ég stífaði þessi og var það orðið tölvuvert gulnað... ætla sko ekki að nota lím aftur því að mér finnst það vera svo subbulegt ;)

Garn: Satúrnus
Heklunál: 2,0 mm
Uppskrift: http://www.ravelry.com/patterns/library/whimsical-heart-doily