Heklaðar buxur

 

Frænka mín bað mig að hekla á sig buxur í líkingu við þær sem hún hafði séð á TikTok og auðvitað varð ég við því þrátt fyrir að mér þættu þær ekki fallegar... ekki frekar en Harry Styles peysan sem hún slefar yfir. Ég hafði ekki gert neitt í höndunum í langan tíma og þetta var bara gaman og mér þykir þær hafa komið rosalega vel út og mun fallegri en ég bjóst við að þær yrðu 

Maður hafði svo sem ekkert til að styðjast við og smá vesen að finna hvernig væri best að gera þetta þar sem maður þarf að láta ömmuferningana passa sem best og ekkert hægt að bæta smá við hér og þar. Ég taldi best að hafa hanka á buxunum og band og það væri þá hægt að skipta því út fyrir belti síðar ef hún vill.

Ég held bara að þetta hafi tekist vel upp hjá mér en eina sem ég lenti í var að buxurnar síkkuðu talsvert eftir þvottinn þannig að það er ein röð af ferningum sem ég faldaði inn á... það er þá amk hægt að síkka þær aftur ef þær styttast í næsta þvotti 😆

Garn: Kambgarn
Heklunál: 3,5 mm
Uppskrift: engin

Prjónaðar tuskur - Waffle Love

Ég á svo mikið af garni og ætla að minnka eitthvað af bómullargarninu með því að prjóna tuskur... svo þægilegt að prjóna svona lítil stykki og þægilegt að hafa eitthvað í höndunum yfir sjónvarpinu. 

Ég byrjaði á að prjóna þessa uppskrift og er hún fín... eina að hún er ekki eins falleg á bakhliðinni 😋 Mjög einföld uppskrift og mjög fljótprjónuð.

Garn: Mandarin Petit

Prjónar: 3,5 mm

Uppskrift: Waffle Love

Prjónað vesti

Þetta vesti var ég að gefa bara í gær en önnur frænka mín bað mig að prjóna á sig vesti sem átti ekki að vera með v-hálsmáli og átti að vera stutt. Þar sem frænka mín býr ekki á landinu þá gat ég ekki fengið hana til að máta. Ég byrjaði á að finna uppskrift til að styðjast við en ég valdi fíngerðara garn þar sem hún er bara 12 ára og vestið þurfti því að vera ca í stærð XS😊

Ég studdist því við uppskriftina og miðaði lykkjufjöldann í stærð S en svo þurfti ég að breyta nánast öllu öðru... en það varð að vera styttra og því þurfti ég líka að finna bara út úr ca hvenær ég átti að byrja á handveginum og hálsmálinu og svo varð ég líka að hafa axlirnar aðeins mjórri. Þegar hún kom svo til landsins þá kom í ljós að vestið var of stutt og handvegurinn að mínu mati pínu of þröngur þannig að ég rakti upp og bætti við 6 umferðum og þá passaði það fínt.

Eina sem ég er ekki sátt við að mér finnst allt önnur áferð á þegar ég prjóna fram og til baka eða í hring... þarf kannski að æfa mig meira í því 😎

Garn: King Cole Anti-Tickle Merino Blend DK
Prjónar: 4,5 og 5,0 mm
Uppskrift: College Days

Lopapeysa Lopi 120

Frænka mín bað mig um að prjóna á sig lopapeysu en hún ætlaði til Eyja á Þjóðhátíð 2020... en svo kom Covid og núna er engin Þjóðhátíð... en þar sem það er Verslunarmannahelgin þá mundi ég eftir að ég ætti eftir að blogga um lopapeysuna sem ég prjónaði á hana 😆

Þökk sé Ravelry þá sá ég að ég byrjaði á peysunni 1. nóvember í fyrra en svo kom Covid og maður nennti engu en ég kláraði hana svo 13. maí og gaf henni. Hún valdi uppskriftina og litina og hún kom bara vel út og gaman að prjóna hana. Gæti alveg hugsað mér að prjóna fleiri lokaðar peysur því að þá er nánast enginn frágangur... en eins og svo oft áður þá snéri ég mynstrinu við þ.e. prjónaði hana ofan frá sem er að mínu mati rétta leiðin til að prjóna lopapeysur því að þá er hægt að máta og hún verður eins og maður vill hafa hana.

Garn: tvöfaldur plötulopi
Prjónar: 5,5 og 6,5 mm
Uppskrift: Ístex Álafoss Lopi 120 einblöðungur

Annað heklað vintage teppi

Munið þið eftir heklaða vintage teppinu sem ég kláraði í byrjun árs 2013? Það var heklað úr einföldum plötulopa og úr mörgum litum sem var raðað af handahófi. Það var svo gaman að hekla það að ég byrjaði á öðru í júlí sama ár en nú úr tvöföldum plötulopa og ég ætlaði að nota það í hjólhýsinu sem ég átti... en þar var litaþemað appelsínugult :)

Ég var rosalega dugleg að hekla í útilegunum og kláraði það næstum því... nema að ég gat ekki ákveðið hvernig kant ég vildi hafa á því. Svo dagaði það bara uppi eins oft vill verða.

Svo var mamma að segja mér að ömmu minni vantaði ullarteppi og þá mundi ég eftir teppinu og bara heklaði kant á það þvoði það og gaf henni það en nú á ég nýtt hjólhýsi sem er ekki með neinu appelsínugulu í... verð bara að hekla annað fyrir það! 😄

Ég mældi það ekki en það er risastórt enda hafði ég hugsað mér að það væri hægt að nota það sem rúmteppi í hjólhýsinu... fallegt teppi sem bara passar ekki í litaþemað heima hjá mér og bara æðislegt ef amma mín getur notað það til að ylja sér 💖

Ég hlakka bara til að fara að hekla annað og ætla ekki að láta það taka meira en 6 ár að klára!

Garn: tvöfaldur plötulopi
Heklunál: 8,0 mm
Uppskrift: engin en þið getið lesið um hvað er í líkingu við það á hinu teppinu.

Riddari lopapeysa - prjónuð ofan frá

Ég gat varla beðið eftir að klára peysuna mína til að prjóna peysu á eiginmanninn... ég lenti í smá vandræðum í byrjun en ég skyldi ekki hvað hún ætlaði að verða eitthvað lítil og maðurinn minn ætlaði varla að koma hausnum í gegn... þar til ég mældi prjónana 😶

Mjög gaman að prjóna þessa og fannst mér hún miklu flottari en mín peysa... afhverju valdi ég mér ekki þetta mynstur? 😋 Mun vonandi prjóna þessa aftur einhvern tímann.

Ég prjónaði hana líka ofan frá eins og ég mun sennilega alltaf gera þegar ég prjóna lopapeysur... eina rétta leiðin eins og ég sagði í póstinum í gær 😉 Ég er mjög ánægð með hana en rúllukanturinn var smá vesen þar sem ég opnaði peysuna en kom bara nokkuð vel út þó að ég segi sjálf frá... hefði mátt gera einni umferð til viðbótar í hálsmálinu út af uppfitinu.

Garn: Ístex léttlopi
Prjónar: 3,5 og 4,5 mm
Heklunál: 4,0 mm
Uppskrift: Riddari úr Lopi 28

Hlekkur lopapeysa - prjónuð ofan frá

Ég er ódugleg að skella inn póstum hingað inn á bloggið... en er aðeins duglegri að skella myndum inn á Facebook síðuna. Nú er ég loksins sest fyrir framan tölvuna og get farið að blogga en ég kláraði peysuna 1. júlí sl. 😆

Þar sem ég nenni ekki að gera prjónafestuprufur og prjóna svo laust að þá finnst mér best að prjóna þær ofan frá svo að það sé hægt að máta þær eins og manni hentar til að sjá strax hvort að þær komi til með að passa. Þegar ég prjóna ofan frá þá í rauninni nota ég bara uppskriftina í blaðinu en les þær eðilega öfugar þannig að ég byrja á hálsmálinu og eyk þá út í mynstrinu í staðinn fyrir úrtöku. Mér finnst þessi aðferð vera sú eina rétta og svo þarf maður ekkert að lykkja saman undir höndunum 😉

Eins og sést á myndinni þá var ég að prjóna upp úr peysukjól sem ég ætlaði að prjóna á mig fyrir nokkrum árum síðan og hann varð alltof víður á mig þegar ég byrjaði á mynstrinu og ég henti þessu frá mér... nú er ég að reyna að nýta það sem maður á og minnka í leiðinni draslið í skápunum 😉

Sumarið var yndislegt og gat ég því verið í útilegum að prjóna... og máta peysuna jafnóðum. Ég jók smá út í hliðunum þannig að peysan fékk smá A-snið en það snið hentar mér betur en beinar peysur. Þar sem sumarið var svo gott að þá ákvað ég strax og ég var búin með þessa peysu að skella í Riddara á eiginmanninn.

Ég er alveg ánægð með peysuna en samt finnst mér mynstrið vera full stórt og ég var alls ekki hrifin af hálsmálinu og það endaði með því að ég heklaði eina umferð meðfram því með svörtu. Svo hefði ég viljað hafa meiri mun á milli gráu litanna en ég hafði átt ljós gráan en mér fannst hann falla svo inn í hvíta litinn og mynstrið varð ekki nógu skýrt.

Garn: Ístex léttlopi
Prjónar: 3,5 og 4,5 mm
Heklunál: 4,0 mm
Uppskrift: Hlekkur úr Lopi 28

Hekluð gardína

Ég átti víst alltaf eftir að blogga um eldhúsgardínuna mína sem tók nokkur ár að hekla reyndar með löngum hléum... en ég var reyndar búin að pósta mynd á Facebook síðunni í nóvember 😉

Ég flutti fyrir 5 árum og var staðráðin í að hekla mér eldhúsgardínu og hafði verið búin að kaupa gardínublað einhverju áður og hófst handa reyndar tæpu ári eftir að ég flutti eða í janúar 2015 (sé það inni á Ravelry sem er snilld til að halda utan um alla hluti).

Þar sem mér leiðist afskaplega að vera endalaust að gera það sama þá kastaði ég þessu verkefni ansi oft frá mér og að lokum bara gleymdist það inni í skáp. Ég rakst svo á þetta aftur í október í fyrra og fletti upp hvenær ég hefði byrjað á því og þá ákvað ég að nú væri kominn tími á að klára og láta ekki enn fleiri ár líða 😂 Ég sá að það var mjög lítið eftir þannig að ég sat stíft við til að klára og upp skyldu gardínunar fyrir jól... það gerðist en ég reyndar uppskar geðveika vöðvabólgu í kjölfarið 😏

Það var pínu mál að strekkja gardínuna þar sem hún er svo löng en ekkert mál með góðum græjum 😁 Ég keypti þessa mottu á bland.is á sínum tíma og strekkivírana í Handprjón og hef sko notað þá mikið. Eina sem ég áttaði mig ekki á var hve gardínan lengdist mikið við strekkingu en ég gerði alveg ráð fyrir smá en þetta var mun meira en ég bjóst við svo að þá varð bara smá rykking/fellingar á gardínunni í glugganum.

Garn: Solberg Garn 12/4 Mercerisert
Heklunál: 1,75 mm
Uppskrift: Kafégardin med spindler úr Solberg hefte nr. 48

Undurfagurt ungbarnateppi #2

Ég heklaði þetta teppi fyrir nokkuð löngu síðan en átti alltaf eftir að þvo það og strekkja. Ég var að bíða eftir að lítill strákur myndi fæðast í kringum mig en mér þykir mjög gott að eiga ungbarnateppi á lager svo að maður sé ekkert í stressi að hekla 😃

Ég fékk loksins tækifæri til að hitta litla manninn í dag og því get ég loksins bloggað um þetta... en ég sé að það er komið meira en ár síðan ég bloggaði síðast... svo að ég get líka óskað ykkur gleðilegs árs 😜

Þetta er í annað sinn sem ég hekla þetta teppi en þið getið skoðað það fyrra hér. Mér finnst þetta enn vera fallegasta ungbarnateppið en ég á alltaf í smá vandræðum með kantinn... mynstrið er smá snúið í upphafi en svo þegar maður fattar það þá er þetta ekkert mál 😉

Garn: King Cole Cottonsoft
Heklunál: 5,5 mm
Uppskrift: http://www.ravelry.com/patterns/library/mayflower-baby-blanket

Ullarsokkar og vettlingar í stíl

 

Ég held áfram að prjóna úr öllum þessum plötulopa sem ég á... systir mín óskaði eftir ullarsokkum handa sex ára frænda mínum og ég gerði það með glöðu geði og ákvað svo að prjóna vettlinga í stíl :)

Ég held að mér finnist skemmtilegra að prjóna ullarsokka en vettlinga amk skiptir engu máli á hvorn fótinn sokkurinn passar en ég lenti í því að ég er búin að prjóna tvo hægri handarvettlinga og nenni ekki að prjóna tvo vinstri handar til viðbótar *andvarp*

Mér fannst þeir koma skemmtilega út þ.e.a.s. að hafa þá svona yrjótta en ég notaði plötulopa í þremur brúntóna litum. Þannig að mér fannst frændi þyrfti að eiga hlýja vettlinga í stíl við ullarsokkana :)

Ég fann strax aðra uppskrift úr vettlingabókinni góðu... en ég verð nú samt kannski að fara að skoða fleiri uppskriftir og kannski að prjóna einhverja þar sem skiptir ekki máli á hvora höndina þeir eru ;)

Þeir komu ágætlega út og ég auðvitað passaði mig sérstaklega á því að gera vinstri handar vettling ;) Svo passa þeir betur á frænda minn heldur en þessir röndóttu sem voru úr tvöföldum plötulopa og svo eru þeir pottþétt hlýrri.

Sokkar: 
Garn: þrefaldur plötulopi í þremur brúnum tónum
Prjónar: 5,5 mm.
Uppskrift: Yrjóttir barnasokkar í fimm stærðum úr bókinni Sokkar og fleira

Vettlingar:
Garn: þrefaldur plötulopi í þremur brúnum tónum
Prjónar: 4,5 og 6,0 mm.
Uppskrift: Vettlingar fyrir 4-10 ára úr þreföldum plötulopa úr bókinni Vettlingar og fleira

Röndóttir vettlingar handa frænda

Sex ára frændi minn kom í heimsókn til mín um síðustu helgi og pantaði hjá mér vettlinga og þeir áttu að vera röndóttir bláir og svartir... og auðvitað prjónaði frænka svoleiðis vettlinga handa honum :)

Ég notaði uppskrift sem heitir Fluguvettlingar fyrir 4-10 ára en breytti aðeins því að ég notaði tvöfaldan plötulopa og gerði því stærstu stærðina... þeir smellpössuðu en hefðu mátt kannski vera örlítið stærri ef eitthvað er... þannig að ætli ég prjóni ekki fleiri vettlinga handa honum og svo pantaði systir mín ullarsokka á hann... þannig að ég sé alveg fram á smá dund á næstunni :)

Garn: tvöfaldur plötulopi
Prjónar: 4,0 mm og 5,0 mm
Uppskrift: Fluguvettlingar fyrir 4-10 ára við bókina Vettlingar og fleira

Lopavettlingar úr tvöföldum plötulopa

Það er svo gaman að prjóna úr lopa... þrátt fyrir að allt heimilið verði loðið og mig klæi í nefið ;) Ég á svo mikið af lopa að ég ætla að dunda mér við að prjóna fullt af vettlingum úr afgöngunum enda veitir ekki af að eiga góða og hlýja lopavettlinga í þessari veðráttu :)

Þessir eru úr bókinni Vettlingar og fleira eftir Kristínu Harðardóttur en ég er búin að eiga þessa bók í mörg ár en ég man ekki hvort að ég hafi nokkuð prjónað úr henni áður... fínasta uppskrift og mun vonandi prjóna fleiri vettlinga úr bókinni svo að það grynnki aðeins í garnhrúgunni minni ;)

Garn: tvöfaldur plötulopi
Prjónar: 4,0 mm og 5,0 mm
Uppskrift: Nokkrir mynstraðir vettlingar úr tvöföldum plötulopa úr bókinni Vettlingar og fleira

Skjaldmey - lopapeysa

Ég prjónaði fyrir nokkrum árum síðan lopapeysu á mig úr tvöföldum lopa sem ég hef notað mikið... svo mikið að það eru komin göt á hana og því varð ég að prjóna mér nýja. Mig hafði lengi langað til að gera Skjaldmey eða alveg síðan Lopablaðið kom út og ég sá hana í blaðinu... en aldrei gefið mér tíma í að prjóna eina slíka. En nú var auðvitað kjörið að nýta tækifærið þar sem mig vantaði nýja peysu.

Ég þarf auðvitað að stækka uppskriftirnar og nenni sjaldan að gera prjónafestuprufu þannig að ég ákvað að prjóna hana ofan frá og ég segi það sem ég hef oft áður sagt... ég skil ekki að allar peysuuppskriftir séu ekki hannaðar svoleiðis... það er svo þægilegt að geta mátað og séð strax ef eitthvað mætti betur fara... þannig peysan passar alltaf... tja reyndar átti annað eftir að koma í ljós ;)

Ég prjónaði peysuna og bjóst alveg við að það myndi teygjast á mynstrinu og hún síkka pínu en já hún síkkaði mjög mikið eins og sjá má á þessari mynd sem sýnir peysuna fyrir og eftir þvott.

Ég velti þessu fyrir mér og ég var ekki nógu ánægð með hvað ermarnar voru víðar og reyndar síðar... þannig að ég klippti þær af og prjónaði nýjar og hafði þær einni umferð styttri. Einnig ákvað ég að hekla eina umferð með einbandinu meðfram kantinum þar sem mér fannst hann ekki nógu sléttur og tók líka eina umferð meðfram hálsmálinu til að þrengja það pínu og svo setti ég nokkrar pelsakræjur sem sjást ekki til að geta haft hana hneppta... er miklu ánægðari með peysuna svona ;)

Já ég breytti líka aðeins meiru en ég sagði hér að ofan... eða eiginlega öllu nema hugsanlega mynstrinu. Ég vildi hafa peysuna létta og ákvað að nota frekar tvöfaldan plötulopa frekar en Álafosslopa og sé sko ekki eftir því. Ég breytti líka ermunum en þær koma niðurmjókkandi en það hentar mér mun betur en einhverjar útvíðar ermar... ég reyndar hafði þær líka niðurmjókkandi þessar sem ég klippti af en ég gerði bara meiri úrtökur en ég gerði áður.

Garn: Tvöfaldur plötulopi og einband
Prjónar: 6,5 mm
Uppskrift: stuðst við Skjaldmey í Lopa nr. 32

Ljósmóðurteppið #2

Vá þetta er fyrsta bloggfærsla ársins. Ég hef lítið verið í að föndra á árinu enda komin með nýtt áhugamál sem er búið að eiga hug minn allan... en það er ég sjálf en ég ákvað í byrjun þessa árs að breyta um lífstíl :) Hvað um það þá er ég samt ekkert hætt í handavinnunni heldur bara afkasta ég mun minna en ég hef gert áður.

Mér finnst nauðsynlegt að hafa eitthvað í höndunum þegar ég horfi á sjónvarpið og því ákvað ég að skella í eitt ljósmóðursteppi en ég hafði áður gert eitt slíkt. Ég hafði séð teppi þar sem búið var að þræða silkiborða í slíkt og ákvað ég því að gera eitt slíkt.

Það er ótrúlega fljótlegt að hekla þetta teppi og ætli ég bara endi ekki með lager ef ég finn mér ekki eitthvað annað til að hekla... en það er ótrúlegt hvað silkiborðinn setur mikinn svip á teppið að mér finnst ;)

Kantinn ætlaði ég að gera úr bókinni Around the Corner - Crochet Borders eftir Edie Eckman en hætti svo við að halda áfram þegar ég var búin með fyrstu umferðina því að mér fannst þetta bara vera nóg :)

Garn: King Cole Big Value Baby DK
Heklunál: 4,0 mm
Uppskrift: http://littlemonkeyscrochet.com/call-the-midwife-inspired-baby-blanket-free-pattern/

Hugleiðingar um höfundarétt

Afhverju er ég að eyða tíma mínum í að skrifa niður uppskriftir?

Þetta eru kannski ekki merkilegir hlutir í augum margra og kannski átta margir sig ekki á því að þetta er kannski búið að kosta mig marga daga vinnu. Ég er t.d. langt komin með að hanna nýtt snjókorn þannig að ég get tekið það sem dæmi hvernig ég vinn þetta. 

• Hugmynd: fyrst af öllu fær maður auðvitað einhverja hugmynd og gerjast með hana í kollinum í smá tíma og fer að rissa svo snjókornið niður á blað. 
• Frumhönnun: næst fer maður að hekla og þá oft breytist krotið því að sumt er bara ekki hægt að framkvæma auðveldlega. Maður prófar hitt og þetta og krotar einhverja grófa lýsingu niður á blað. 
• Frágangur: þegar snjókornið er tilbúið þá þarf að stífa það. 
• Endurhönnun: þegar maður er búinn að stífa snjókornið þá sér maður að kannski hefði maður átt að gera eitthvað annað og fer í að hekla nýtt snjókorn og krotar niður lýsinguna. 
• Vinnsla: svo stífar maður það og ef maður er sáttur þá fer maður og skrifar niður uppskriftina. 
• Prófanir: ég reyni að kappkosta við að hafa uppskriftina rétta þannig að þegar ég er búin að skrifa hana niður þá hekla ég eftir henni og oft þarf að gera leiðréttingar.
• Lokavinnsla: þegar uppskriftin er klár þá þarf að taka myndir og vinna þær og þá loksins er hægt að setja uppskriftina inn á bloggið.
• Þýðing: til að sem flestir hafi getað notið þá hef ég þýtt uppskriftirnar mínar á ensku. Það lengir ferlið því að fyrst þýði ég og svo hekla ég eftir þýðingunni.
• Eftirfylgni: þegar búið er að birta uppskriftina þá er mjög oft haft samband við mig varðandi hitt og þetta. Sumir einfaldlega eru kannski ekki sleipir í að hekla eða lesa uppskriftir og hafa samband :)

Mér hefur fundist þetta bara gaman og sjálfsagt að gefa af mér... og orðið pínu montin þegar ég sé að einhver er að gera eins... EN ég er kannski frekar pirruð núna en mér finnst ég vera í endalausum barningi við fólk á netinu við að verja það sem ég hef skapað. Það er eins og fólki finnist sjálfsagt að það geti gert hvað sem er við það sem er birt ókeypis á netinu. 

Ég merki myndirnar mínar vandlega með blogginu og set inn klausu um höfundarréttinn þ.e. að það megi ekki afrita uppskriftina á neinn máta inn í uppskriftina. Þrátt fyrir þetta þá verð ég vör við að myndum mínum er deilt hingað og þangað um netið á hinum ýmsum síður þar sem búið er að hafa fyrir því að kroppa merkinguna mína af þeim. Það að það fylgi í smáu letri undir með vísun eða hlekk í bloggið mitt gefur ekki fólki rétt til að taka myndirnar mínar og breyta þeim að vild. Mér finnst að það ætti að vera sjálfsögð kurteisti þegar verið er að nota myndirnar mínar að hafa þá þær með merkingunni minni með.

Einnig hef ég verið að eyða tíma mínum við að þýða uppskriftirnar á ensku svo að fleiri geti notið... því miður tel ég mig ekki færa til að skrifa uppskriftirnar á fleiri tungumálum. Það að uppskriftir mínar séu ekki til á fleiri tungumálum gefur fólki ekki rétt á að þýða þær og birta á bloggunum sínum eða jafnvel inn á Ravelry eins og ég hef rekið mig á. Ef ég myndi lesa bók á ensku og hún væri ekki til á íslensku þá myndi ég ekki hafa leyfi á að þýða hana og birta hana bara á blogginu mínu. Ég sé ekki hvernig fólk getur fundist þetta vera eitthvað öðruvísi.

Það eina sem ég get gert þegar ég rekst á eitthvað svona er að biðja fólk um að eyða þessu hjá sér eða skipta út myndunum og ég er bara upp á samvisku hvers og eins komin... oft er þetta lagfært en stundum er mér bara einfaldlega ekki svarað.

Mér hefur fundist hingað til ekkert mál að deila með öðrum og væri bara ekki frábært ef allt í heiminum væri ókeypis. Nú eru örugglega margir sem spyrja afhverju er mér ekki bara sama? Þá spyr ég bara á móti afhverju á mér að vera sama? Á mér að vera sama að aðrir eignir sér heiðurinn... að fólk fái meiri umferð á síðuna hjá sér fyrir vikið sem gefur þeim auglýsingatekjur? 

Æji mér finnst þetta bara vera glatað... ég var langt komin með að gera nýja snjókornauppskrift sem ég ætlaði að sjálfsögðu að birta en núna finnst mér þetta bara allt eitthvað svo tilgangslaust þegar maður er að berjast við vindmyllur... vildi bara að fólk væri ekki að stela og gæfi mér bara smá kredit fyrir vinnuna mína sem ég hef lagt í þetta ;)

Salmon Glacier Snowflake

Þriðja snjókornið er tilbúið og ég náði að smella mynd af því í smá dagsbirtu... en birtuskilyrðin fyrir myndatökur eru ekki góðar á þessum árstíma þannig að stundum þarf maður bara að vera þolinmóður ;)

Ég persónulega er ekkert sérstaklega hrifin af þessu snjókorni og fannst ekki gaman að strekkja það... kannski er það bara fullkomnunaráráttan að hrjá mann... en ekki misskilja mig að mér finnist það ljótt en ég hef bara gert svo mörg önnur flottari ;)

*fliss* ég sé núna þegar ég er að blogga að ég hef greinilega ekki skoðað myndina sem er í uppskriftinni þegar ég var að strekkja... því að mitt lítur allt öðruvísi út því að ég strekkti það greinilega öðruvísi... það liggur við að ég bleyti það og strekki upp á nýtt... hvað finnst ykkur?

Garn: DMC Babylo size 10
Heklunál: 1,5 mm
Uppskrift: https://snowflakepatterns.wordpress.com/salmon-glacier-snowflake/

Mill Creek Snowflake

Þetta snjókorn heklaði ég líka í september og stífði það loksins á laugardaginn. Þetta snjókorn er eftir sama hönnuð og ég mæli með því að þið kíkið á síðuna hennar... snjókornin hennar eru hvert öðru fallegra og ég skil ekki hvernig hún nær að afkasta svona miklu :)

Ég lenti í svolitlum vandræðum með þessa uppskrift og fékk hana ekki til að ganga upp... eftir smá höfuðverk fann ég út úr þessu amk gekk þetta upp hjá mér. Ef þið ætlið að hekla þetta snjókorn og lendið í vandræðum þá getið þið kíkt á punktana mína á "projectinu" inn á Ravelry. Engu að síður er þetta gullfallegt snjókorn en dálítið í stærri kantinum ;)

Garn: DMC Babylo size 10
Heklunál: 1,5 mm
Uppskrift: http://www.snowcatcher.net/2016/02/snowflake-tuesday.html

Big Top Snowflake

Heklaði þetta snjókorn í september en dreif mig loksins í að stífa það í gærkvöldi. Fallegt snjókorn úr smiðju Deborah Atkinson. Frekar auðvelt að stífa það en ég var á báðum áttum með hvort að ég ætti að hafa það oddhvassara en ákvað að stífa það eins og Deborah gerði :)

Ef þið gerið þetta snjókorn þá fannst mér vera smávægileg villa í uppskriftinni en þið getið lesið um það í punktum mínum inn á Ravelry.

Garn: DMC Babylo size 10
Heklunál: 1,5 mm
Uppskrift: http://www.snowcatcher.net/2016/01/snowflake-sunday.html

Maia sjalið mitt

Ég er rosalega skotin í nýjasta sjalinu mínu... finnst það svo fallegt. Eins og ég hef áður sagt þá er Lisa Naskrent (crochetgarden.com) uppáhalds sjalahönnuðurinn minn og þetta er einmitt eftir hana. Ég hef heklað nokkur sjöl eftir hana og á örugglega eftir að hekla fleiri :)

Ég ákvað að hekla þetta sjal úr garni sem ég átti í "hrúgunni" minni en ég hafði fengið manninn minn til að bera það heim frá Ameríku fyrir nokkrum árum. Ég reyndar verð að viðurkenna að ég persónulega er hrifnari í dag af einlitu garni en ég átti þetta bara til og því notaði ég það ;)

Garnið er frá Knitpicks og heitir Shimmer en það er hætt framleiðslu á því. Garnið er yndislega mjúkt en það er 70% úr Baby Alpaca og 30% silki og er handlitað.

Það gekk vel að hekla sjalið en eins og svo oft áður þá dugði garnið ekki í fyrstu tilraun en ég sá það á næst síðustu umferðinni... þannig að ég þurfti að rekja meira en 1/3 af sjalinu upp til að hætta fyrr í fyrsta mynstrinu... en það er svo gaman að hekla að það gerði ekkert til ;) Ég myndi reyndar aldrei hugsa svona ef sjalið væri prjónað því að það er ofar mínum skilningi hvernig það er hægt að rekja upp margar umferðir (ekki nema með hjálparlínum) og er ég nú með eitt hálf prjónað sjal sem ég fékk ekki til að ganga upp og ég held bara að ég reki það upp og hekli úr garninu frekar!

Sjalið stækkaði mikið þegar ég strekkti það og varð svo miklu fallegra fyrir vikið þar sem mynstrið opnaði sig svo vel. Ég tel að það sé fallegra að hafa stærri nál en minni ef maður sé maður í vafa hvort að maður eigi að hækka upp eða lækka niður í númeri ;) Ég snappaði sjalaþvottinn og strekkinguna frá A-Ö eins og þeir sem fylgja mér á Snapchat (notandanafnið mitt er fondrari) hafa sennilega séð en ég vistaði söguna og þið getið séð hana hér:
https://www.facebook.com/Fondrari/videos/1095410463885944/

Flottustu sjölin sem ég hef heklað að mínu mati eru eftir Lisa Naskrent og eru hérna í þeirri tímaröð sem ég gerði þau:

    

    

Ég er ekki nógu ánægð með myndina af sjalinu útbreiddu og ætlaði að reyna að taka betri myndir en ég nenni ekki að bíða lengur með að blogga um þetta svo að þessar myndir verða bara að duga ;)

Garn: Knit Picks Shimmer Hand Dyed Lace Yarn
Heklunál: 4,5 mm
Uppskrift: http://www.ravelry.com/patterns/library/maia-shawl