Ullarsokkar og vettlingar í stíl

 

Ég held áfram að prjóna úr öllum þessum plötulopa sem ég á... systir mín óskaði eftir ullarsokkum handa sex ára frænda mínum og ég gerði það með glöðu geði og ákvað svo að prjóna vettlinga í stíl :)

Ég held að mér finnist skemmtilegra að prjóna ullarsokka en vettlinga amk skiptir engu máli á hvorn fótinn sokkurinn passar en ég lenti í því að ég er búin að prjóna tvo hægri handarvettlinga og nenni ekki að prjóna tvo vinstri handar til viðbótar *andvarp*

Mér fannst þeir koma skemmtilega út þ.e.a.s. að hafa þá svona yrjótta en ég notaði plötulopa í þremur brúntóna litum. Þannig að mér fannst frændi þyrfti að eiga hlýja vettlinga í stíl við ullarsokkana :)

Ég fann strax aðra uppskrift úr vettlingabókinni góðu... en ég verð nú samt kannski að fara að skoða fleiri uppskriftir og kannski að prjóna einhverja þar sem skiptir ekki máli á hvora höndina þeir eru ;)

Þeir komu ágætlega út og ég auðvitað passaði mig sérstaklega á því að gera vinstri handar vettling ;) Svo passa þeir betur á frænda minn heldur en þessir röndóttu sem voru úr tvöföldum plötulopa og svo eru þeir pottþétt hlýrri.

Sokkar: 
Garn: þrefaldur plötulopi í þremur brúnum tónum
Prjónar: 5,5 mm.
Uppskrift: Yrjóttir barnasokkar í fimm stærðum úr bókinni Sokkar og fleira

Vettlingar:
Garn: þrefaldur plötulopi í þremur brúnum tónum
Prjónar: 4,5 og 6,0 mm.
Uppskrift: Vettlingar fyrir 4-10 ára úr þreföldum plötulopa úr bókinni Vettlingar og fleira

Röndóttir vettlingar handa frænda

Sex ára frændi minn kom í heimsókn til mín um síðustu helgi og pantaði hjá mér vettlinga og þeir áttu að vera röndóttir bláir og svartir... og auðvitað prjónaði frænka svoleiðis vettlinga handa honum :)

Ég notaði uppskrift sem heitir Fluguvettlingar fyrir 4-10 ára en breytti aðeins því að ég notaði tvöfaldan plötulopa og gerði því stærstu stærðina... þeir smellpössuðu en hefðu mátt kannski vera örlítið stærri ef eitthvað er... þannig að ætli ég prjóni ekki fleiri vettlinga handa honum og svo pantaði systir mín ullarsokka á hann... þannig að ég sé alveg fram á smá dund á næstunni :)

Garn: tvöfaldur plötulopi
Prjónar: 4,0 mm og 5,0 mm
Uppskrift: Fluguvettlingar fyrir 4-10 ára við bókina Vettlingar og fleira

Lopavettlingar úr tvöföldum plötulopa

Það er svo gaman að prjóna úr lopa... þrátt fyrir að allt heimilið verði loðið og mig klæi í nefið ;) Ég á svo mikið af lopa að ég ætla að dunda mér við að prjóna fullt af vettlingum úr afgöngunum enda veitir ekki af að eiga góða og hlýja lopavettlinga í þessari veðráttu :)

Þessir eru úr bókinni Vettlingar og fleira eftir Kristínu Harðardóttur en ég er búin að eiga þessa bók í mörg ár en ég man ekki hvort að ég hafi nokkuð prjónað úr henni áður... fínasta uppskrift og mun vonandi prjóna fleiri vettlinga úr bókinni svo að það grynnki aðeins í garnhrúgunni minni ;)

Garn: tvöfaldur plötulopi
Prjónar: 4,0 mm og 5,0 mm
Uppskrift: Nokkrir mynstraðir vettlingar úr tvöföldum plötulopa úr bókinni Vettlingar og fleira

Heklaðir barnavettlingar

Ég ákvað að klára að hekla hinn vettlinginn sem ég gerði í prufuheklinu. Á eftir að sjá hvort að þeir passi á 6 ára frænda minn :)

Ég er ekki sérlega hrifin af Létt-lopa... mér finnst plötulopinn miklu skemmtilegri því að hann er meira "flöffí" og mýkri... er að spá í hvort að ég eigi ekki að hekla mér eina en uppskrift af fullorðins vettlingum má finna í Þóru - heklbók en ætli ég þurfi ekki að aðlaga hana svolítið :)

Garn: Létt-lopi
Heklunál: 4,5 mm
Uppskrift: Þumalína - barnavettlingar úr Maríu - heklbók

Einfaldir vettlingar úr léttlopa

Ég er pínu með vettlingaæði núna... sennilega af því að ég get bara haft eitthvað lítið á prjónunum þar sem ég er í pásu frá ýmsum stærri verkefnum... þannig að ég ætla ekki að ráðast í stærri verkefni fyrr en hin eru búin :)

Ég vildi gera barnavettlinga þar sem ég fékk smáa gesti til mín um jólin sem höfðu gleymt að taka vettlinga með sér og þá hefði nú verið gott að frænka hefði getað átt vettlinga handa þeim... það verður bara næst ef ég verð ekki búin að gefa þá hehehe

Ég rakst á þessa vettlinga og mér fannst þeir svo sniðugir því að það skiptir ekki máli á hvora höndina þeir fara. Ég mun örugglega gera fleiri svona en ég held að ég kunni betur við að hafa smá mynstur í þeim :)

Garn: Léttlopi
Prjónar: 3,5 og 4,0 mm
Uppskrift: http://www.ravelry.com/patterns/library/einfaldir-lopavettlingar-me-umaltungu

Vettlingar úr afgöngum

Mér finnst svakalega sniðugt þegar verið er að nýta afganga í að prjóna vettlinga... ekki hefur nú veitt af því að vera með hlýja vettlinga að undanförnu :) Ég ákvað því að prjóna vettlinga úr afganginum af síðustu peysu og láta fylgja með peysunni. Þar sem ég hef nú ekki prjónað mikið af vettlingum og hef ekki módel við höndina til að máta þá fannst mér öruggara að finna mér uppskrift. Fann þessa ágætu uppskrift í fleiri prjónaperlum en ákvað samt að breyta aðeins mynstrinu.

Ég veit ég á það til að prjóna laust... nema heldur fastar í mynstrinu og vonandi verð ég einhvern tímann betri í því. En þessi vettlingauppskrift finnst mér samt einum of stór. Ég prjónaði stærð 6-9 ára og þeir passa á mig... og mér finnst þeir heldur of víðir meira að segja neðst. En ég bara græddi vettlinga á því ;)

Ég hafði reyndar prjónað aðra vettlinga úr þessari sömu bók og mér fannst þeir hefðu alveg mátt vera aðeins stærri fyrir minn smekk... :) Mér finnst nú varla taka því að gera prjónafestuprufur fyrir svona lítil stykki... enda ætti ekki að muna miklu þegar svona lítill hlutur er að ræða :) En ég þarf greinilega að fara að prjóna aðeins fastar ;)

Garn: Léttlopi
Prjónar: 3,5 og 4,5 mm
Uppskrift: Fleiri prjónaperlur

Lopahúfa og vettlingar með áttblaðarósinni

Ég átti svo mikinn afgang af lopa eftir að ég prjónaði lopapeysuna Valdísi að ég mátti til með að skella í húfu og vettlinga... enda sumarið búið að vera fremur svalt að undanförnu... þetta á eftir að koma sér þrusuvel í útilegunum í sumar :) Reyndar hefði ég viljað setja stjörnuna úr mynstrinu af Valdísi á vettlingana en þá hefðu þeir verið of stórir :) En litirnir passa við svo að þetta gengur vel við peysuna :)

Garn: Tvöfaldur plötulopi
Prjónar: vettlingar: 4,0 mm og 5,0 mm - húfa: 5,5 mm.
Uppskrift: Fleiri prjónaperlur

Heklaðir barnavettlingar

Hef lengi ætlað að hekla vettlinga (eins og svo margt annað). Ég sá að Eyþór frændi minn var í ansi litlum vettlingum á leikskólanum fyrir jól... þannig að ég lét verða að því núna að hekla vettlinga handa honum... vona bara að þeir passi á hann. Þetta er sem sagt frumraun mín vettlingahekli... ætli það sé til aðferð til að hekla tvo vettlinga í einu eins og að prjóna tvo í einu? ;) Ætli ég drífi svo ekki í að hekla stærri vettlinga handa systur hans :)

Garn: Trysil Garn Oda
Heklunál: 6,0
Uppskrift: upp úr mér

Viðbót 18. febrúar 2011 
Vettlingarnir smellpössuðu á frænda... og hann er svo ánægður með þá að hann er með þá inni á deild á leikskólanum :)