Meira krukkuhekl

Best að efna það að vera duglegri að blogga :) Ég er búin að vera að hekla ýmislegt, sumt get ég ekki bloggað um strax og sumt er langtímaverkefni... en ég gríp alltaf á milli í nokkrar krukkur og eftir að ég keypti stærri bakka þá finnst mér ég verði að fylla hann. Þannig að efni þessar bloggfærslu eru þessar tvær nýju krukkur og svo fær ein gömul að fljóta með sem ég bloggaði ekki um í bloggleti minni :)

Þessi var að detta af nálinni í dag og er krukka undan sultu. Hún er sérlega fíngerð og núna finnst mér krukkurnar mínar úr fíngerðu garni fallegastar ;) Það er mun erfiðara að hekla þær en þær eru sko þess virði að mínu mati :) Ég held að ég sé að detta alfarið í þetta fíngerða... það styttist örugglega í að ég fari að hekla snjókorn og bjöllur ;)

Garn: Solberg 12/4
Heklunál: 1,5 mm
Uppskrift: engin


Þessa gerði ég í vikunni og setti mynd inn á Facebook-síðuna eins og þeir sem líka við síðuna mína hafa séð. Þessi er frekar lítil eins og þið sjáið á fyrstu myndinni hér fyrir ofan.

Garn: Solberg 12/4
Heklunál: 1,5 mm
Uppskrift: engin


Hér er svo ein "gömul" sem ég sé að ég hef ekki bloggað um en þökk sé Ravelry þá sé ég að ég hef lokið við hana 25. janúar. Þetta er risastór rauðkálskrukka :)

Garn: Satúrnus
Heklunál: 2,0 mm
Uppskrift: engin

Hekluð krukka #2 - uppskrift

Ég elska að hekla utan um krukkur og þar sem Skeljakrukku uppskriftin mín er búin að vera svo vinsæl þá ákvað ég að henda í aðra uppskrift handa ykkur :)

Ekki afrita og dreifa uppskriftinni sjálfri en þið megið að sjálfsögðu deila linknum á uppskriftina að vild.

| Fleiri uppskriftir | English version  |

Hekluð krukka #2

Það getur þurft að aðlaga svolítið uppskriftirnar eftir því hvernig krukku og/eða garn er verið að nota. Í þessa krukku notaði ég Satúrnus garnið (100% bómull - 200 g - ca 680 m) og 2,0 mm heklunál og krukku undan rauðbeðum eða rauðkáli (hún er ca 15 cm á hæðina og 28 cm að ummáli).

Skammstafanir:
ll = loftlykkja,
kl = keðjulykkja,
fl = fastalykkja,
st = stuðull,
tbst = tvöfaldur stuðull,
llb = loftlykkjubogi,
L = lykkja,
umf = umferð,
[...]x2 = gera innihaldið tvisvar sinnum.

Botn:
Gerið galdralykkju (magic ring).
1. umf. 3 ll (telur sem st), 11 st utan um hringinn, tengja með kl í 3. ll. Dragið galdralykkjuna saman (samtals 12 st).
2. umf. 3 ll (telur sem st), 1 st í sömu L, *2 st í hverja L* endurtaka út umf það sem er á milli * *, tengja með kl í 3. ll (samtals 24 st).
3. umf. 3 ll (telur sem st), 1 st í sömu L, 1 st, *2 st í sömu L, 1 st* endurtaka út umf það sem er á milli * *, tengja með kl í 3. ll (samtals 36 st).
4. umf. 3 ll (telur sem st), 1 st í sömu L, 2 st, *2 st í sömu L, 2 st* endurtaka út umf það sem er á milli * *, tengja með kl í 3. ll (samtals 48 st).
5. umf. 3 ll (telur sem st), 1 st í sömu L, 3 st, *2 st í sömu L, 3 st* endurtaka út umf það sem er á milli * *, tengja með kl í 3. ll (samtals 60 st).

Núna þekur stykkið nánast botn krukkunar en ef þið eruð með stærri krukku þá getið þið fjölgað umf með sama sniði þ.e. st á milli fjölgar um 1 í hverri umf þannig að næst yrði gert 2 st í sömu L, 4 st en athugið að enda á því að hafa fjölda lykkja þannig að 10 gangi upp í fjöldann.

Krukkan:
Mynstrið sjálft er margfeldi af 10.
6. umf. 1 ll, fl í sömu L, 4 ll, hoppa yfir 3 L, fl í hverja af næstu 3 L, *4 ll, hoppa yfir 3 L, fl í næstu L, 4 ll, hoppa yfir 3 L, fl í hverja af næstu 3 L*, endurtaka út umf það sem er á milli * *, endið á að gera 2 ll og 1 st í fl í upphafi umf til að mynda síðasta llb (12 llb).
7. umf. fl utan um llb sem endað var á að mynda í síðustu umf, 4 ll, fl í næsta llb, 4 ll, hoppa yfir fl, fl í næstu fl (miðju fl af þremur í umf. á undan), *[4 ll, fl í næsta llb]x2, 4 ll, hoppa yfir fl, fl í næstu fl (miðju fl af þremur í umf. á undan)*, endurtaka út umf það sem er á milli * *, endið á 2 ll og 1 st í fl í upphafi umf (18 llb).
8. umf. fl utan um llb sem endað var á að mynda í síðustu umf, 9 tbst í næsta llb, fl í næsta llb, *4 ll, fl í næsta llb, 9 tbst í næsta llb, fl í næsta llb*, endurtaka út umf það sem er á milli * *, endið á að gera 2 ll og 1 st í fl í upphafi umf (samtals 6 skeljar og 6 llb).
9. umf. fl utan um llb sem endað var á að mynda í síðustu umf, 4 ll, hoppa yfir 3 tbst, fl í hvern af næstu 3 tbst (ég geri alltaf fl í þá sjálfa svo að þetta sé akkúrat í miðjunni), *4 ll, fl í næsta llb, 4 ll, hoppa yfir 3 tbst, fl í hvern af næstu 3 tbst,*, endurtaka út umf það sem er á milli * *, endið á að gera 2 ll og st. í fl í upphafi umf (12 llb).

Endurtakið umf. 7-9 þar til stykkið nær upp að háls krukkunar með því að toga það svolítið upp. Endið endurtekninguna á 8. umf.

Gangið frá upphafsenda og smeygið krukkunni í stykkið og gerið því næst 9. umf en hafið þó aðeins 3 ll á milli í stað 4 ll og endið á 3 ll og kl í upphafs fl.

Þá er komið að hálsinum sjálfum. Mér finnst fallegra að hekla yfir skrúfganginn á krukkunni en ef þið viljið frekar þá getið þið stoppað hér.

Háls:
1. umf. 1 ll, *2 hst í næsta llb, hst í hverja af næstu 3 fl, 2 hst í næsta llb, hst í næstu fl*, endurtaka út umf það sem er á milli * *.
2. umf. hst í hverja L (heklað í spíral).

Endurtakið 2. umf. þar til búið er hekla utan um hálsinn, endið svo á kl í L frá fyrri umf. Klippið og gangið frá enda.


© Ólöf Lilja Eyþórsdóttir - það má ekki afrita uppskriftina á neinn máta án míns samþykkis.

Hér er svo linkur á uppskriftina á Ravlery fyrir þau ykkar sem eru þar:
http://www.ravelry.com/patterns/library/crochet-jar-cover-2

Heklað utan um krukkur

Voðalega er ég löt að blogga... en sem betur fer er ég miklu duglegri að hekla ;) Það sést reyndar meira til mín á Facebook-síðu bloggsins þannig að ef þið viljið fylgjast betur með mér þá er kjörið að smella einu "læki" á síðuna :)

Ég hóf sem sagt strax handa við að byrja á eldhúsgardínum eftir að ég kláraði baðgardínurnar sem var það síðasta sem ég bloggaði um sem var í janúar! Ég er eiginlega búin með neðri kappann en er aðeins að hugsa hvort að ég vilji hafa þær alveg beinar eða smá rykkingu... og svo er stóra spurninginn hvort að ég fíli nokkuð að hafa tvo kappa :) Þannig að það verkefni er komið í smá bið. Ég á *hóst* ansi mörg verkefni sem eru á bið... hálfkláruð sjöl, hálkláruð teppi osfrv... ég ætla samt ekki að láta gardínuna fara í þann pakka... ég lofa ;)

Ég er svo líka búin að vera að hekla utan um krukkur annað slagið. Ég því miður hef ekki alltaf skrifað hjá mér hvaða heklunál ég notaði og hvar ég fann mynstrið en ég er að spá í að reyna að grafa þetta upp og skella inn bloggfærslum með krukkunum.

Best að byrja þá að skella inn þessari sem ég heklaði utan um í gær. Ég var ekki nógu ánægð með myndirnar en þær verða bara að duga að sinni. Mér finnst mér vanta einhvern fallegan bakgrunn svo að krukkurnar njóti sín... en þetta þarf ekkert að vera fullkomið er það nokkuð?

Þegar ég var að hekla mynstrið þá fannst mér það eitthvað kunnulegt og jú viti menn ég hafði heklað þetta áður þegar ég var að prufuhekla uppskrift... sem sagt ég á krukku með þessu mynstri en hún kom reyndar öðruvísi út vegna þess að ég notaði stærri heklunál og annað garn... og jú svo var auðvitað botninn og toppurinn öðruvísi.

Garn: Solberg Garn 12/4 Mercerisert
Heklunál: 1,5 mm
Uppskrift: engin en mynstrið er #203 í The Complete Book of Crochet Stitch Designs


Læt eina aðra krukku fylgja sem ég heklaði um daginn sem fór í hjólhýsið en það er allt appelsínugullt í því þannig að hún var auðvitað í stíl við það ;)

Garn: Mandarin Petit
Heklunál: 2,5 mm
Uppskrift: http://fondrari.blogspot.com/2013/11/heklu-krukka-uppskrift.html

Hekluð krukka - uppskrift

Mér þykir rosalega gaman að hekla utan um krukkur en það er svo gaman að endurnýta eitthvað í stað þess að fleygja því í ruslið. Nú er akkúrat tíminn fyrir kertaljós og kósýheit þannig að ég skellti í eina uppskrift í stað þess að hekla bara af fingrum fram. Ég var nefnilega búin að sjá að það er ekkert svakalega mikið um uppskriftir á íslensku og vil því leyfa fleirum að njóta :)

Það er hins vegar svolítið tímafrekt að búa til uppskriftir ef maður vill vanda vel til verks og sérstaklega utan um krukkur því að það þarf að vera hægt að aðlaga uppskriftina að ýmsum stærðum. Uppskriftir vilja líka breytast svolítið frá fyrstu týpu þannig að ég eyddi töluverðum tíma í þetta en ég vona að þið verðið sátt við útkomuna.

| Fleiri uppskriftir | English version  |

Skeljakrukka

Það getur þurft að aðlaga svolítið uppskriftirnar eftir því hvernig krukku og/eða garn er verið að nota. Ég mæli með því að hekla botn undir krukkurnar því að mér finnst annars flöturinn undir hitna mikið. Svo er auðvitað gott að minnast á mikilvægi þess að skilja aldrei logandi kerti í krukkunum án eftirlits.

Ég nota bómullargarn s.s. Bianca frá Marks, Cotton 8/4 Merceriseret frá Mayflower eða Bomuld 8/4 Merceriseret frá Løve Garn, 2,5 mm heklunál og krukku undan hnetusmjöri frá Sollu.

Skammstafanir:
ll = loftlykkja,
kl = keðjulykkja,
fl = fastalykkja,
st = stuðull,
tbst = tvöfaldur stuðull,
llb = loftlykkjubogi,
L = lykkja,
umf = umferð,
2stsam = úrtaka, *slá bandinu upp á, fara með nálina í næstu L og ná í bandið, [slá bandinu upp á og draga í gengum tvær L]; endurtaka frá * 1 sinni til viðbótar, slá bandinu upp á og draga í gegnum allar 3 L á nálinni.

Botn:
Gerið galdralykkju (magic ring).
1. umf. 3 ll (telur sem st), 9 st utan um hringinn, tengja með kl í 3. ll. Dragið galdralykkjuna saman (samtals 10 st).
2. umf. 3 ll (telur sem st), 1 st í sömu L, *2 st í hverja L* endurtaka út umf það sem er á milli * *, tengja með kl í 3. ll (samtals 20 st).
3. umf. 3 ll (telur sem st), 1 st í sömu L, 1 st, *2 st í sömu L, 1 st* endurtaka út umf það sem er á milli * *, tengja með kl í 3. ll (samtals 30).
4. umf. 3 ll (telur sem st), 1 st í sömu L, 2 st, *2 st í sömu L, 2 st* endurtaka út umf það sem er á milli * *, tengja með kl í 3. ll (samtals 40).

Núna þekur stykkið nánast botn krukkunar en ef þið eruð með stærri krukku þá getið þið fjölgað umf með sama sniði þ.e. st á milli fjölgar um 1 í hverri umf þannig að næst yrði gert 2 st í sömu L, 3 st.

Krukkan:
Mynstrið sjálft er margfeldi af 8. Þannig að þið þurfið að aðlaga næstu umf að mynstrinu ef þið eruð með fleiri umf í botninum. Ef ykkur finnst stykkið vera of þröngt og of vítt með því að fjölga endurtekningum þá er hægt að bæta við ll sitt hvorum megin við tbst. Gott að prófa að setja krukkuna í stykkið eftir 6.-7. umf til að sjá hvort að stykkið sé nokkuð of vítt á krukkunni.

5. umf. 3 ll (telur sem st), *1 st í hverja L* endurtaka út umf það sem er á milli * *, tengja með kl í 3. ll (samtals 40 st).
6. umf. 4 ll (telur sem tbst), *hoppa yfir 3 L, (3 tbst, ll, 3 tbst) í næstu L, hoppa yfir 3 L, 1 tbst í næstu L* endurtaka út umf það sem er á milli * * en sl síðasta tbst í síðustu endurtekningunni, tengja með kl í 4. ll.
7. umf. 4 ll (telur sem tbst), *(3 tbst, ll, 3 tbst) í gatið á millið stuðlahópanna, 1 tbst í næsta tbst* endurtaka út umf það sem er á milli * * en sl síðasta tbst í síðustu endurtekningunni, tengja með kl í 4. ll.

Endurtakið 7. umf. þar til stykkið nær upp að háls krukkunar með því að toga það svolítið upp. Mér þykir fallegra að hafa stykkið þétt um krukkuna. Ég gerði 7. umf samtals 5 sinnum.

Þið gætuð þurft að smeygja krukkunni í stykkið fyrir næstu umf en annars eftir hana. Gangið frá upphafsendanum áður en þið haldið áfram.

12. umf. 6 ll (telur sem st og 3 ll), *1 fl í gatið á milli stuðlahópanna, 3 ll, 1 st í tbst, 3 ll* endurtaka út umf það sem er á milli * * en sleppið að gera st í tbst og 3 ll í síðustu endurtekningunni, tengja með kl í 3. ll.

Háls:
Gott að reyna að hekla nokkuð fast næstu umferðir.

13. umf. *4 fl í næsta llb, sl fl, 4 fl í næsta llb, sl st* endurtaka út umf það sem er á milli * * en endið á því að gera 4 fl í síðasta llb og tengja með kl í fyrstu fl (samtals 40 fl)

Þá er komið að því að þrengja opið en þarna gætuð þið þurft að aðlaga úrtökuna að ykkar krukkum því að hálsarnir eru mjög mismunandi eða jafnvel fækka eða fjölga umferðum.

14. umf. 3 ll (telur sem st), 1 st í hverja L út umf. en takið úr 5 L með reglulegu millibili með því að hekla 2stsam (samtals 35 st).
15. umf. 3 ll (telur sem st), 1 st í hverja L (samtals 35 st).
16. umf. heklið krabbahekl (fl heklaðar í öfuga átt) í hverja L.
Klippið og gangið frá endanum.

Svo er bara um að gera að skella einu sprittkerti í og njóta :)

© Ólöf Lilja Eyþórsdóttir - það má ekki afrita uppskriftina á neinn máta án míns samþykkis.

Hér er svo linkur á uppskriftina á Ravlery fyrir þau ykkar sem eru þar:
http://www.ravelry.com/patterns/library/skeljakrukka---crochet-jar-cover

Litskrúðugt krukkuhekl

Eins og þeir sem líka við Facebooksíðu bloggsins hafa tekið eftir þá hef ég verið óstöðvandi í að hekla utan um krukkur undanfarna daga. Mér finnst þetta akkúrat vera tíminn til að sitja inni og hafa kósý meðan veðrið dynur á gluggunum. Ég var ekki búin að hekla í nokkra daga en ég var komin með pínu hekl-leiða á stóru verkefnunum sem ég er með í gangi þá var kjörið að finna einhver lítil verkefni til að upphefja andann :)

Ég ætla bara að skella inn fullt af myndum af þessum dásemdum... mér finnst þetta vera svo kósý :)

 

 

Ég er ánægðust með þessar tvær krukkur þ.e. appelsínugula og lillabláa þó að auðvitað eru þær allar sætar :) 



 

Garn: í allar krukkurnar nema gulu: Løve Garn Bomuld 8/4 Merceriseret, gula krukkan: Marks & Kattens Bianca.
Heklunál: 2,5 mm
Uppskrift: engar en ég skoðaði mörg mynstur í mynsturbók sem ég á en svo vafraði ég bara um netið og skoðaði Pinterest og fann nokkur mynstur þannig.


Úpps... ég var að gleyma þessum sem ég byrjaði á að gera... amk gleymdi ég þeim þegar ég tók hópmyndina ;)

Garn: Trysil Tuva
Heklunál: 3,0 mm
Uppskrift: engin

Er ekki kertaljósatíminn að renna upp?

Það er eitthvað svo dimmt þegar það rignir og rignir að ég held að kertaljósatíminn sé runninn upp eitthvað fyrr en vanalega þetta árið. Ég elska kertaljós og stóðst ekki mátið að bjóða fram krafta mína þegar það var verið að leita að einhverjum til að prufuhekla þessa uppskrift... enda eru krukkurnar hennar Elínar svo flottar :)

Ég á örugglega eftir að gera fleiri svona krukkur enda sætt mynstur en ég myndi þá nota fínna garn og/eða minni nál til að fá þær þéttari. Ég teygði þessa svolítið til að hafa hana þétta á krukkunni og fyrir vikið var hún svolítið gisin... en samt svaka flott :)

Garn: ONline Filetta
Heklunál: 1,75 mm
Uppskrift: http://www.ravelry.com/patterns/library/crocheted-jar-cover-3

Vintage kertið að verða eins og lugt

Þá er loksins kertið farið að brenna eitthvað niður... eftir að hafa haft það nánast logandi frá morgni til kvölds í nokkra daga ;)

Eins og sjá má þá er kertið farið að brenna niður og pappírinn verður eftir... og hann brennur ekkert enda bar ég vel á hann af Candle & Soap :)

Framhald af þessari færslu: http://www.fondrari.blogspot.com/2012/04/kerti-me-vintage-mynd.html

Fleiri skreytt kerti

Ég gat ekki hætt að föndra í gær og föndraði því fleiri kerti... þetta er afraksturinn:

Þetta síðasta er minna en hin kertin... hins vegar þurfti ég að eyða heilu blaði í það þar sem hálft A4 dugði ekki utan um það... því að ég læt samskeytin fara vel yfir svo að það mun ekki leka með þeim. Er samt að spá í að láta myndirnar ekki ná uppfyrir brúnina á kertinu en ég hélt kannski að það væri betra... amk er flottara að hafa ekki brúnina uppfyrir á meðan kertin eru ónotuð.

Ég hafði kveikt á fyrsta kertinu sem ég gerði í marga klukkutíma í gær og það var ekki komið niður neitt að ráði... ég mun smella inn mynd þegar það fer að brenna niður til að sýna hvernig kertið verður eins og lugt :) Aldrei þessu vant þá fannst mér kertið ekki brenna nógu hratt ;)  

Viðbót 29.11.2012:

Vegna fjölda fyrirspurna sem ég hef fengið þá ætla ég að skella bara svarinu hingað inn. Spurt hefur sem sagt hvar ég hafi fundið myndir til að setja á kertin. Svarið við því er að ég bara gúgglaði og gúgglaði. Yfirleitt þá myndaleitaði ég með orðinu vintage t.d. vintage postcards og vintage child :)

Kerti með vintage mynd

Ég var búin að sjá myndir af kertum sem voru þannig að þegar þau brunnu niður þá varð eftir hólkur þannig að kertið varð eins og lampi... mér finnst það voðalega flott.

Þannig að ég ákvað að föndra eitt svoleiðis og á örugglega eftir að gera fleiri. Þetta er nú auðvelt en kannski svolítið tímafrekt að finna myndir :) Ég fann vintage mynd á netinu, prentaði hana út á frekar þykkan pappír, klippti til, penslaði bakhliðina með Candle & soap og setti á kertið... og þá var það tilbúið... ekki mikið mál... nú þarf ég bara að láta það loga svolítið ;)

Efni: pappír, Candle & Soap, kerti

 

 

Viðbót 29.11.2012:

Vegna fjölda fyrirspurna sem ég hef fengið þá ætla ég að skella bara svarinu hingað inn. Spurt hefur sem sagt hvar ég hafi fundið myndir til að setja á kertin. Svarið við því er að ég bara gúgglaði og gúgglaði. Yfirleitt þá myndaleitaði ég með orðinu vintage t.d. vintage postcards og vintage child :)

Hekluð blómasería

Ég bara næ að föndra smá núna... kannski er ástæðan sú að ég minnkaði námið um eitt fag og/eða bara að það er stutt síðan skólinn byrjaði :)

Mig langaði til að skipta út þæfðu túlípanaseríunni minni sem er fjólublá yfir í eitthvað sumarlegra... er ekki alveg að koma vor? Mér finnst ég amk aðeins farin að finna fyrir að það birtir fyrr og er aðeins lengur bjart á daginn ;) Ég var búin að rekast á blómaseríur á netinu sem voru með einföldum blómum og þær voru þannig að blómin voru ekki þétt heldur gisin... vona að þið skiljið hvað ég meina :)

Ég fór því aðeins að fikta í gær og heklaði tvöföld blóm úr léttlopa en ég elska lopa :) Hér eru myndir af afrakstrinum þeas að hekluðu blómaljósaeríunni minni:

Garn: Léttlopi
Heklunál: 4 mm
Uppskrift: http://www.ravelry.com/patterns/library/heklu-blomaljosaseria

Heklað utan um stóra krukku

Mér áskotnaðist fyrir nokkrum árum nokkrar risastórar krukkur sem ég hafði notað undir kerti en ákvað núna að hekla utan um eina til að skreyta fyrir utan hjá mér í tilefni þess að ég bý í bleika hverfinu á bæjarhátíð þar sem ég bý. Mér fannst þetta bara lukkast nokkuð vel en fannst ég verða að prufa að hekla líka utan um lokið svo að krukkan gæti staðið úti alltaf og myndi ekki fyllast af vatni... þannig að ég skelli bara lokinu á þegar ég er ekki að nota hana. Ég var nú samt í vandræðum með lokið þar sem ég sá nú fram á að þetta myndi fjúka af í næsta roki þannig að ég setti teppalím ofan á og smá á hliðina og vonandi dugar það til :)

Annar er ég svo svakalega symmetrísk að ég verð að hekla mér aðra :)

Garn: Sandnes Garn Mandarin Petit
Heklunál: 3,5 mm
Uppskrift: engin - er bara upp úr mér

Litagleði - fleiri krukkur

Prófaði að hekla úr einbandi þar sem mér finnst litirnir vera svo fallegir... kemur ágætlega út þó að mér finnist samt bómullargarnið verða áferðarfallegra :)  Mun klárlega fara með nokkrar heklaðar krukkur í fellihýsið og nota þegar dimma fer í sumar :)

Hekluð krukka - taka tvö :)

Ég var ekki lengur alveg sátt við hinar krukkurnar mínar... bæði fannst mér toppurinn vera svo víður og svo voru þær hvítar og mér fannst það bara eitthvað svo svakalega hvítt í dagsbirtu :)  Ég á nú orðið svolítið mikið af krukkum þannig að ég gerði aðra tilraun og ég datt niður á þessa lausn... og ég er líka ekkert smá ánægð með hana... finnst hún svo svakalega sæt og rómó :)

Aðalbreytingin er sú að kanturinn er nettari en ég gerði 5 x hálfstuðla og svo er auðvitað snúran sem strekkir að og puntar helling :) Mig langar að gera úr fínna garni en samt er ég á báðum áttum þar sem ég er svo svakalega hrifin af grófu... langar líka til að prófa að gera úr einbandi... sjáum til hvað verður úr :) Annars er ég að spá í að taka þessa með mér í búðina sem ég er að vinna í núna svo að aðrir geti séð hana :)

Garn: Mandarin Petit
Heklunál: 3,5 mm.

Valentínusardagurinn

Við hjónin höldum nú ekki upp á þennan dag sérstaklega... en er svo sem ekki allt í lagi að gera eitthvað smá sætt handa ástinni sinni sama hvaða dagur er?

Maðurinn minn elskar bækur... svo að mér fannst tilvalið að gefa honum þetta í dag :)

Í uppskriftinni er þessi hjörtu í lengju (garland)... það finnst mér voðalega sætt og það er aldrei að vita að ég búi til svona lengju einhvern daginn :)

Garn: Trysil Garn Sportsgarn
Heklunál: 4,0
Uppskrift: http://www.skiptomylou.org/2009/01/28/crochet-heart-garland/

Heklaðar bjöllur

Þetta var ástæðan fyrir því að ég skellti mér á námskeið hjá Fræðsluneti Suðurlands til að læra að hekla. Mig langaði svo svakalega að geta heklað mér svona jólabjöllur :) Það gleymdist alveg að kenna mér að hekla í grunnskóla og ég var búin að vera að skoða á netinu leiðbeiningar og skoða myndbönd á youtube... en svo sá ég auglýst þetta námskeið og ákvað að læra þetta nú almennilega :) Sé sko alls ekki eftir því enda hef ég verið óstöðvandi í heklinu.

Uppskriftina má finna hér:
https://bland.is/messageboard/messageboard.aspx?advtype=59&advid=16385444

Túlípana ljósaseríur

Ég fór eitt sinn á námskeið til að læra að gera hálsmen úr þæfðum kúlum. Þar var notuð merino ull sem þæfð var utan um trékúlur. (Hér getið þið séð skartgripina)

Ég rakst á netinu að það var verið að þæfa utan um golfkúlur og sett svo á ljósaseríur. Ég sá að flestir voru að gera þetta í þvottavél en ég var ekki til í að fórna minni... reyndar sá ég líka að sumir voru að nota frauðkúlur og prófaði það en mér fannst útkoman ekki nógu jöfn og falleg... það sannast að ekkert jafnast á við handgert :)

Þetta er auvitað mikil handavinna... en mér finnst þetta vera mjög skemmtilegt... svolítið minna samt í sniðum að gera í skartgripi. Mér fannst smartast að vera með hvítan grunnlit og setja svo annan yfir. Minn smekkur er að hafa þetta frekar þunnt en samt að hylja alveg yfir grunnlitinn. Ég notaði svo þynntan uppþvottalög til að þæfa úr. Mér fannst líka flott að stífa þær þannig að þær séu vel opnar og notaði ég stífelsi úr Föndru til verksins sem mig grunar nú að sé bara útþynnt trélím... amk var lyktin eins :) Þegar ég klára þetta stífelsi þá held ég að ég muni bara kaupa næst trélím og þynna það með vatni. Svo notaði ég límbyssuna til að tylla blómunum á seríuna því annars voru þau alltaf að detta af.

Efni: Íslensk kemba