Annað heklað vintage teppi

Munið þið eftir heklaða vintage teppinu sem ég kláraði í byrjun árs 2013? Það var heklað úr einföldum plötulopa og úr mörgum litum sem var raðað af handahófi. Það var svo gaman að hekla það að ég byrjaði á öðru í júlí sama ár en nú úr tvöföldum plötulopa og ég ætlaði að nota það í hjólhýsinu sem ég átti... en þar var litaþemað appelsínugult :)

Ég var rosalega dugleg að hekla í útilegunum og kláraði það næstum því... nema að ég gat ekki ákveðið hvernig kant ég vildi hafa á því. Svo dagaði það bara uppi eins oft vill verða.

Svo var mamma að segja mér að ömmu minni vantaði ullarteppi og þá mundi ég eftir teppinu og bara heklaði kant á það þvoði það og gaf henni það en nú á ég nýtt hjólhýsi sem er ekki með neinu appelsínugulu í... verð bara að hekla annað fyrir það! 😄

Ég mældi það ekki en það er risastórt enda hafði ég hugsað mér að það væri hægt að nota það sem rúmteppi í hjólhýsinu... fallegt teppi sem bara passar ekki í litaþemað heima hjá mér og bara æðislegt ef amma mín getur notað það til að ylja sér 💖

Ég hlakka bara til að fara að hekla annað og ætla ekki að láta það taka meira en 6 ár að klára!

Garn: tvöfaldur plötulopi
Heklunál: 8,0 mm
Uppskrift: engin en þið getið lesið um hvað er í líkingu við það á hinu teppinu.

Undurfagurt ungbarnateppi #2

Ég heklaði þetta teppi fyrir nokkuð löngu síðan en átti alltaf eftir að þvo það og strekkja. Ég var að bíða eftir að lítill strákur myndi fæðast í kringum mig en mér þykir mjög gott að eiga ungbarnateppi á lager svo að maður sé ekkert í stressi að hekla 😃

Ég fékk loksins tækifæri til að hitta litla manninn í dag og því get ég loksins bloggað um þetta... en ég sé að það er komið meira en ár síðan ég bloggaði síðast... svo að ég get líka óskað ykkur gleðilegs árs 😜

Þetta er í annað sinn sem ég hekla þetta teppi en þið getið skoðað það fyrra hér. Mér finnst þetta enn vera fallegasta ungbarnateppið en ég á alltaf í smá vandræðum með kantinn... mynstrið er smá snúið í upphafi en svo þegar maður fattar það þá er þetta ekkert mál 😉

Garn: King Cole Cottonsoft
Heklunál: 5,5 mm
Uppskrift: http://www.ravelry.com/patterns/library/mayflower-baby-blanket

Ljósmóðurteppið #2

Vá þetta er fyrsta bloggfærsla ársins. Ég hef lítið verið í að föndra á árinu enda komin með nýtt áhugamál sem er búið að eiga hug minn allan... en það er ég sjálf en ég ákvað í byrjun þessa árs að breyta um lífstíl :) Hvað um það þá er ég samt ekkert hætt í handavinnunni heldur bara afkasta ég mun minna en ég hef gert áður.

Mér finnst nauðsynlegt að hafa eitthvað í höndunum þegar ég horfi á sjónvarpið og því ákvað ég að skella í eitt ljósmóðursteppi en ég hafði áður gert eitt slíkt. Ég hafði séð teppi þar sem búið var að þræða silkiborða í slíkt og ákvað ég því að gera eitt slíkt.

Það er ótrúlega fljótlegt að hekla þetta teppi og ætli ég bara endi ekki með lager ef ég finn mér ekki eitthvað annað til að hekla... en það er ótrúlegt hvað silkiborðinn setur mikinn svip á teppið að mér finnst ;)

Kantinn ætlaði ég að gera úr bókinni Around the Corner - Crochet Borders eftir Edie Eckman en hætti svo við að halda áfram þegar ég var búin með fyrstu umferðina því að mér fannst þetta bara vera nóg :)

Garn: King Cole Big Value Baby DK
Heklunál: 4,0 mm
Uppskrift: http://littlemonkeyscrochet.com/call-the-midwife-inspired-baby-blanket-free-pattern/

Ljósmóðurteppið

Loksins get ég bloggað um ljósmóðurteppið eða The Midwife blanket, sem ég heklaði í síðasta mánuði handa litlum krúttmola, þar sem ég gaf það í dag :) Ég er sem sagt ekki alveg bara að hekla snjókorn og jólaskraut... þó að það sé bjölluframleiðsla í gangi þessa dagana ;)

Það var svakalega gaman að hekla þetta teppi og uppskriftin mjög auðveld og góð... eða kannski þar til kom að kantinum en mér fannst hann ekki koma alveg nógu vel út... þannig að ég gerði bara mína útgáfu að kanti. Ég gæti alveg hugsað mér að hekla fleiri svona og jafnvel prófa að hekla úr mjúku akrýlgarni.

Ég gerði 10 x 17 ferninga og teppið varð ca 84 x 113 cm að stærð... sem mér fannst ágæt stærð en auðvitað er þetta smekksatriði... en ég hef heklað teppi sem mér fannst vera of lítil og vildi ekki hætta á það... held að það sé mun betra að hafa þau of stór en of lítil ;)

Garn: Kambgarn
Heklunál: 3,5 mm
Uppskrift: http://littlemonkeyscrochet.com/call-the-midwife-inspired-baby-blanket-free-pattern/

Heklað ungbarnateppi

Þetta teppi var gjöf handa fallegri prinsessu sem fæddist í síðasta mánuði og þar sem ég búin að gefa það þá get ég loksins bloggað um það. Það lá við að ég hætti við í miðju kafi út af öllum endunum sem ég þurfti að ganga  frá en mér fannst það svo fallegt að það var alveg fyrirhafnarinnar virði :)

Ég hef áður heklað teppi með þessu mynstri eða eiginlega tvö... en þau voru annars vegar úr einföldum plötulopa og hins vegar úr tvöföldum. Þannig að þetta var mun fíngerðara en hin :) Ég prufaði líka að hafa mismunandi gróft garn og mér fannst það alls ekki koma illa út :) Ég elska hvað þetta er fallega bleikt og sætt.

Það er rosalega erfitt að taka flotta mynd með fínum bakgrunni af teppum... en læt þessa samt fylgja til að sýna teppið í heild sinni. Stærðin var ríflega 70 x 90 cm.

Garn: Kartopu Basak og Kartopu Junior Soft
Heklunál: 4,0 mm
Uppskrift: Ég kunni mynstrið en þegar ég var að spá í kantinum þá fann ég hér svipaða uppskrift: http://www.petalstopicots.com/2014/10/v-stitch-crochet-ripple-afghan-pattern/

Undurfagurt ungbarnateppi

Loksins get ég montað mig! Ég er búin að bíða eftir því síðan 19. febrúar en þá kláraði ég að hekla það ;) Góð vinkona mín átti von á lítilli dömu í heiminn um miðjan maí en vegna þess hvað það var mikið að gera í skólanum þá vildi ég vera tímanleg með gjöfina... og er ég núna loksins búin að hitta litlu sætu dömuna svo að ég get montað mig ;)

 

 

Mér finnst sjálfri þetta ótrúlega fallegt teppi og var það mjög skemmtilegt verkefni. Ég lenti í pínu vandræðum með uppskriftina en mér fannst hún óljós á köflum t.d. lenti ég í því að lykkjufjöldinn stemmdi ekki þegar ég var að gera kantinn en sem betur fer náði ég að bjarga málunum án þess að rekja mikið upp ;)  Ég notaði svo strekkivíra til að ná því jöfnu þegar ég lagði það þannig að mynstrið opnaðist vel og varð miklu fallegra fyrir vikið.

Garnið var svo mjúkt og ilmaði svo vel en eftir að ég þvoði það þá fór þessi ilmur og það varð ekki alveg eins mjúkt og það var fyrir þvott. Ég hugsaði að bómull væri praktísk í ungbarnateppi því að það er svo auðvelt að þvo hana og hún heldur sér vel. Hins vegar er hún pínu þung þannig að það væri gaman að prófa að hekla einhvern tímann aftur svona teppi úr þvottheldri ull :)

Garn: King Cole Cottonsoft
Heklunál: 5,5 mm
Uppskrift: http://www.ravelry.com/patterns/library/mayflower-baby-blanket

Heklað vintage teppi

Það var samhekl (CAL) inni á grúbbunni Handóðir heklarar á Facebook á svakalega fallegu teppi... ég var auðvitað alveg sjúk en ég gat bara ekki leyft mér að byrja á öðru teppi þar sem ég er með annað í vinnslu og svo var brjálað að gera í skólanum og stutt í prófin... þannig að ég hét á mig að ef mér myndi ganga vel í prófunum þá gæti ég heklað þetta teppi í jólafríinu :) Það gekk eftir og ég byrjaði að hekla á Þorláksmessu.

Það er verið að selja uppskrift af svona teppi og er ég með link á uppskriftina hér fyrir neðan. Ég veit auðvitað ekki alveg hvort að þetta sé eins þar sem ég fór ekki eftir neinni uppskrift heldur sá þetta bara út með því að skoða myndir af teppum inni á Ravelry.

Teppið er mjög skemmtilegt að hekla og fljótheklað ef þið notið ekki mjög fínlegt garn. Ég notaði einfaldan plötulopa en ég sá að nokkrar voru að nota hann í samheklinu og ég var mjög spennt... sérstaklega þar sem ég elska lopann og svo skemmir ekki verðið á honum heldur fyrir enda mjög dýrt að kaupa gæðagarn í teppi :) Ég notaði sjö liti og raðaði þeim á handahófskenndan hátt en þó ekki þannig að ljósu litirnir röðuðust saman. Ég notaði fjóra brúntóna liti, hvítan, fjólubláan og mosagrænan og finnst þetta koma mjög vel út.

Teppið er mjög létt og lipurt og ég mæli með plötulopanum... eina spurningin er hvernig endingin verður... en þá bara hekla ég bara fleiri enda sakna ég þess pínu að vera búin með það þar sem mér finnst þetta afar skemmtilegt mynstur. Teppið mitt er ca. 135 x 190 cm að stærð.

Garn: einfaldur plötulopi
Heklunál: 5,0 mm
Uppskrift: Ég fór ekki eftir neinni uppskrift en teppið er í líkingu við þetta teppi
http://www.ravelry.com/patterns/library/vintage-crocheted-throw--afghan

Viðbót 28.01.2013
Ég var að skoða teppi á Ravlery (já ég veit ég er teppasjúk) og sá þar uppskrift sem er ókeypis... en hún er ekki eins en samt svolítið svipuð:
http://www.ravelry.com/patterns/library/express-v-stitch-ripple-afghan

Stórt heklað teppi

Þá er teppið sem ég var að hekla tilbúið... fannst mjög gott að hekla þetta yfir fyrirlestrum og yfir sjónvarpinu þar sem þetta er mjög einfalt og frekar fljótheklað... þar sem teppið er heklað úr svo grófu garni og bara stuðlar :) Ég valdi þetta garn þar sem það er nú ódýrara en Eskimo en hins vegar mjög svipað því garni... mjög mjúkt og gott... hins vegar þæfist það vel... en ég ætla samt að skella því í þvottavélina á ullarprógram og vindingu þar sem teppið er svo stórt og þungt :)

Mér sýnist stærðin vera ca. 130 x 190 cm... amk giska ég á það miðað við að rúmið sem ég setti teppið á er 135 x 200 :)

Finnst bara tveir gallar vera á teppinu... fyrsti er kanturinn... ég gat valið um að hafa hann kipraðan eða svona bylgjóttan (en mér sýndist það vera eins og í uppskriftinni)... hinn gallinn er að stóra táin fer alltaf út um götin þegar ég sit með teppið yfir mér... hehehe

Endilega fylgist með mér á Facebooksíðunni minni ef þið eruð ekki þegar búin að líka við hana :)

Garn: Trysil Garn Igloo
Heklunál: 9,0 mm
Uppskrift: http://www.garnstudio.com/lang/us/pattern.php?id=2175&lang=us

Elífðarverkefni

Ætli það séu ekki margir sem eiga svona eilífðarverkefni... eitthvað verkefni sem er svo erfitt að klára að það liggur bara ofan í skúffu? Ég á eitt slíkt. Mér finnst það voðalega sætt þetta blómateppi. Þetta eru hekluð blóm og svo eru þau saumuð saman... og það er málið... það er svo hrikalega leiðinlegt að sauma það saman ;)

Vonandi klára ég þetta einhvern daginn... ég á reyndar von á frænda eða frænku í haust... og kannski drífur það mig áfram ef þetta verður frænka :)

 

Garn:  Trysil Garn Tuva Helårsgarn
Heklunál: 4 (gömul heklunál frá ömmu... finnst hún vera aðeins stærri en 4,0 mm)
Uppskrift: http://asp.internet.is/starengi114/Johanna/blomateppi.pdf

Hekluð teppi

Ég heklaði mér þetta teppi sumarið 2010. Æðislegt að hekla í sólinni í útilegum... bara svolítið heitt þegar teppið var orðið stórt :)

Ég heklaði svo þetta um daginn... aldrei að vita nema að ég gefi þetta í sængurgjöf einhvern tímann. Þetta teppi er mjög gaman að gera og mjög auðvelt. Ég prófaði að hekla kant í kringum barnateppið en veit ekki hvort að það er flottara :)

Garn: Trysil Garn Superwash Ullgarn (Sportsgarn í stóra teppinu)
Heklunál: 5,0
Uppskrift: Kúr og Lúr