Miðsumarnætursjalið mitt

Loksins fékkst aftur fjólubláa pallíettugarnið... mig langaði svo til að hekla eitt handa mér en ég var svo hrifin af sjalinu sem ég heklaði handa ömmu... en ég er samt eiginlega búin að ákveða að hekla ekki enn eitt Elise sjalið þar sem ég stækka þau alltaf aðeins og vængirnir verða bara ekki jafn langir... er ekki alveg að fíla það.

Ég ákvað að ég þyrfti nú fyrst að klára annað sjal sem ég var búin að henda frá mér vegna annarra spennandi verkefna (er meira segja með eitt annað sjal óklárað sem ég er í fýlu út í)... þannig að ég spýtti í lófana og kláraði sjalið... og var nú ekkert sérlega lengi að því :)

Mér finnst svona þunn "lace" sjöl vera æðislega falleg... garnið sem ég notaði var Randalína I...ég veit ekki hvort að það fáist ennþá en ég var búin að eiga það í nokkur ár... garnið var á köflum eins og tvinni en kannski var það pínu mér að kenna því að ég vatt það upp í höndunum en ég veit það samt ekki. En það er engu að síður mjög fallegt og fíla það mun betur en Randalínu II þar sem mér finnst það pínu þykkt. Ef ég myndi gera svona sjal aftur þá held ég að ég myndi nota einlitt garn þar sem mér finnst mynstrið ekki alveg fá að njóta sín þar sem litaskiptin draga athyglina frá mynstrinu.

Uppskriftin er með charti en ég var samt í vandræðum eins og svo margir aðrir skv. því sem ég sá á Ravelry... rakti upp kantinn nokkrum sinnum en ég var samt ekki 100% sátt við útkomuna því að mér finnst það stækka fullmikið á þessum parti... en þetta sleppur og mér finnst sjalið mitt vera gullfallegt og er það strax orðið uppáhaldssjalið mitt!

Garn: Evilla Artyarn 8/1
Heklunál: 3,5 mm.
Uppskrift: http://www.ravelry.com/patterns/library/midsummer-nights-shawl

Hekluð tuska

Stundum er bara fínt að gera eitthvað lítið og einfalt... svona eins og tuskur... er komin með eitthvert æði að ég held bara ;)

Ég fékk mér nýtt heklunálasett (sem er bara æði)... þannig að ég varð auðvitað að prufa það og fann mér einfalda uppskrift á Ravelry... en þetta er svo einfalt að maður þarf nú ekkert uppskrift... en hér er afraksturinn...

Ég get stundum bara ekki fylgt uppskriftum... í þetta sinn þá áttu að koma fastalykkjur eftir 14 umferðir og svo aftur halda áfram með mynstrið... en ég taldi að það væri ekki að fara að gera sig svo að ég hélt bara áfram. Setti svo 2 umf. af fastalykkjum í kringum hina þrjá kantana. Ef ég myndi fara að gera svona tusku aftur þá myndi ég bara byrja á mynstrinu og hekla svo tvær umferðir af fastalykkjum í kringum stykkið í lokin :)

Garn: Mandarin Classic
Heklunál: 3.5 mm
Uppskrift: http://www.ravelry.com/patterns/library/trigrit-dishcloth


Viðbót 02.02.13
Stærðin á tuskunni er ca. 25 x 19 cm og en ég lét bara eina dokku duga. Ef ég gerði aftur þá myndi ég gera færri loftlykkjur til að reyna að fá hana jafnari á alla kanta.

Heklaðir þvottapokar eða tuskur

Ég veit að ég á að vera að læra um Gauss-Jordan eyðingu og margt fleira en það er bara miklu skemmtilegra að hekla ;)

Mig langaði bara til að hafa eitthvað svona til að grípa í yfir sjónvarpinu og ákvað að hekla tuskur eða þvottapoka... keypti gróft bómullargarn í A4, fann uppskrift og byrjaði strax að hekla... hvað annað?

Uppskriftin er mjög einföld (eins og mottan mín) en ég breytti henni pínulítið því að ég ákvað að hekla kant í kringum með krabbahekli þar sem mér fannst vanta pínu punt :)

Ég varð fyrir miklum vonbrigðum með hvíta garnið þar sem í báðum dokkunum voru skærbleikir blettir á því. Ég lét mig samt hafa það að klára að hekla úr skárri dokkunni sem hafði hnút í bónus að auki... en ég elska grófleikann á bandinu :)

Garn: Marks & Kattens Victoria
Heklunál: 4,0 mm
Uppskrift: http://www.ravelry.com/patterns/library/nubbie-scrubbies

Hekluð motta - ókeypis uppskrift

Ákvað að taka uppskriftina af hekluðu mottunni úr sölu og hafa hana ókeypis amk um tíma. Mikið væri nú gott ef allt í heiminum væri ókeypis :)

Væri gaman að fá að sjá myndir af ykkar mottum ef þið skellið í eina :)

Uppskriftina má nálgast hérna:

http://www.ravelry.com/patterns/library/heklu-motta---crochet-rug

Hekluð mús

Fékk þessa sætu bók í jólagjöf... en ég hafði bara einu sinni áður gert amigurumi... en það var skjaldbaka sem ég nota sem nálapúða.

Ég settist fyrir framan sjónvarpið í kvöld og bara varð að hekla eitthvað upp úr henni... fyrir valinu var þessi krúttlega mús...

Þegar ég fletti bókinni þá fannst mér á mörgum myndunum glitta ansi mikið í tróðið (stöffið inn í fígúrunum) hjá höfundi bókarinnar. Ég ákvað því að velja grófara garn en hélt mér við sömu heklunálastærð en valdi létt-lopa... músin er því þétthekluð en mér finnst það fallegra þegar verið er að hekla amigurumi fígúrur. Uppskriftin er mjög auðveld og vel skrifuð... og er afar fljótlegt að hekla músina. Sennilega fór mestur tíminn í að finna einhver augu :)

Garn: léttlopi
Heklunál: 4,0 mm
Uppskrift: Sugar mice úr Super-Cute Crochet: Over 35 Adorable Animals and Friends to Make

Heklað vintage teppi

Það var samhekl (CAL) inni á grúbbunni Handóðir heklarar á Facebook á svakalega fallegu teppi... ég var auðvitað alveg sjúk en ég gat bara ekki leyft mér að byrja á öðru teppi þar sem ég er með annað í vinnslu og svo var brjálað að gera í skólanum og stutt í prófin... þannig að ég hét á mig að ef mér myndi ganga vel í prófunum þá gæti ég heklað þetta teppi í jólafríinu :) Það gekk eftir og ég byrjaði að hekla á Þorláksmessu.

Það er verið að selja uppskrift af svona teppi og er ég með link á uppskriftina hér fyrir neðan. Ég veit auðvitað ekki alveg hvort að þetta sé eins þar sem ég fór ekki eftir neinni uppskrift heldur sá þetta bara út með því að skoða myndir af teppum inni á Ravelry.

Teppið er mjög skemmtilegt að hekla og fljótheklað ef þið notið ekki mjög fínlegt garn. Ég notaði einfaldan plötulopa en ég sá að nokkrar voru að nota hann í samheklinu og ég var mjög spennt... sérstaklega þar sem ég elska lopann og svo skemmir ekki verðið á honum heldur fyrir enda mjög dýrt að kaupa gæðagarn í teppi :) Ég notaði sjö liti og raðaði þeim á handahófskenndan hátt en þó ekki þannig að ljósu litirnir röðuðust saman. Ég notaði fjóra brúntóna liti, hvítan, fjólubláan og mosagrænan og finnst þetta koma mjög vel út.

Teppið er mjög létt og lipurt og ég mæli með plötulopanum... eina spurningin er hvernig endingin verður... en þá bara hekla ég bara fleiri enda sakna ég þess pínu að vera búin með það þar sem mér finnst þetta afar skemmtilegt mynstur. Teppið mitt er ca. 135 x 190 cm að stærð.

Garn: einfaldur plötulopi
Heklunál: 5,0 mm
Uppskrift: Ég fór ekki eftir neinni uppskrift en teppið er í líkingu við þetta teppi
http://www.ravelry.com/patterns/library/vintage-crocheted-throw--afghan

Viðbót 28.01.2013
Ég var að skoða teppi á Ravlery (já ég veit ég er teppasjúk) og sá þar uppskrift sem er ókeypis... en hún er ekki eins en samt svolítið svipuð:
http://www.ravelry.com/patterns/library/express-v-stitch-ripple-afghan

Föt á Barbie

Loksins get ég sýnt það sem ég sat stíft við og heklaði eftir prófin... það voru hekluð föt á Barbie sem ég laumaði í pakkana hjá þremur frænkum mínum... ég var auðvitað á síðustu stundu að gera þetta þar sem þetta var skyndihugdetta... en þetta hafðist þó í tæka tíð en ég saumaði smellur á síðasta kjólinn á Þorláksmessu :)

Það er svolítil vinna í kjólunum enda eru þeir bara eins og litlir dúkar... en hér koma myndir af þeim




Ég óttaðist það að frænkum mínum þættu kjólarnir of gegnsæir þannig að ég ákvað að hekla nærbuxur sem enduðu svo sem bikiní en ég gerði þau bara upp úr mér:)

Uppskriftina af kjólunum má finna inn á Ravelry:
http://www.ravelry.com/patterns/library/morning-glory-fashion-doll-dress

Ég notaði heklunál 1,75 mm en svo er garnið mismunandi:
Bleika garnið: Coats Puppets Eldorado 10
Fjólubláa garnið: Sandnes Garn Mandarin Heklegarn
Rauða garnið: Marks & Kattens Merc. Bomullsgarn 12/3