Heklaður ömmudúkur

Þá er ég komin í jólafrí... og fékk fínar einkunnir úr prófunum :) Jólafríið hófst reyndar fyrir viku síðan en er búin að vera á fullu að græja allt fyrir jólin og líka að hekla nokkrar gjafir... sem ég get auðvitað ekki bloggað um strax ;)

Ég rakst áðan á þennan dúk sem ég heklaði þegar ég var nýbúin að læra að hekla... að ég held bara strax á eftir að ég var búin að hekla jólabjöllurnar :)

Þetta var árið 2010 og þá var ég ekki komin með aðgang á Ravelry og því hef ég ekki hugmynd um hvaða garn ég notaði eða stærðina á heklunálinni... sem mér sýnist hafa verið ansi smá :) Ég fékk uppskriftina hjá góðri konu sem ég var að vinna með og ég held að hún hafi verið úr Nýtt til heimlisins. Hvað um það þá bara varð ég að smella mynd af þessum sæta dúk og leyfa ykkur að sjá :) Ef þið kannist við uppskriftina þá væri ég alveg til í að fá að vita hvaðan hún kom :)

Er núna í óða önn að taka upp jólaskrautið og reikna með að taka myndir af föndrinu hennar ömmu og blogga um það á morgun :)

Heklað pallíettusjal

Ég elska sjöl og reyndar ljósaseríur eins og klárlega má sjá á hlutum sem ég geri handa sjálfri mér :) Ég var búin að vera í strembnum prófalestri þar til á laugardagskvöldið og þá átti ég smá pásu og auðvitað valdi ég að hekla eitthvað. Ég er nú þegar með tvö sjöl sem ég er ekki búin að klára en ég ákvað að byrja á einhverju nýju... afhverju er alltaf svo gaman að gera eitthvað nýtt?

Ég elska líka allt sem glitrar og það vildi til að ég átti fjórar dokkur af þessu pallíetugarni... þannig að ég þurfti bara að fara að finna einhverja uppskrift sem hentaði nokkurn veginn þessu garni. Fyrir valinu var þessi uppskrift en ég skoðaði bara myndir af því en ekki uppskriftina sjálfa... fannst kanturinn vera svo sætur þannig að ég bara ákvað að þetta sjal skyldi ég gera. Þar sem ég er nú stór kona þá vildi ég líka hafa sjalið stórt en ehemm það er nú reyndar full stórt... það var svo gaman að hekla og ég bara vanreiknaði hvað það færi mikið í kantinn að ég þurfti að kaupa fimmtu dokkuna en ég notaði þó lítið af henni.

Uppskriftin reyndist mjög auðveld þannig að þetta var mjög fljótheklað... þannig að ég stalst nú til að hekla á meðan ég var að læra fyrir síðasta prófið... og meira segja þvoði það og strekkti kvöldið fyrir prófið ;)

Garn: King Cole Galaxy
Heklunál: 6,0 mm
Uppskrift: http://www.ravelry.com/patterns/library/cheche-a-la-sauce-bidules-chouettes

Saumað jóladagatal

Ég var að taka myndir af Bucilla jóladagatali sem ég saumaði fyrir nokkrum árum... ég hafði áður gert nokkra jólasokka sem ég mun draga fram þegar nær líður jólum og skella inn myndum af þeim.

 Svona lítur dagatalið út þegar búið er að hengja yfir dagana.... væri þá kominn jóladagur núna ;)

Svona lítur það út í dag 9. desember :) Núna sést að þetta sé dagatal... en mér finnst það samt sætara með öllum fígúrúnum yfir dögunum :)

  

Það liggur rosaleg vinna að baki þessu... svo mikið af litlum smáhlutum enda tók þetta sinn tíma :) Það var smá höfuðverkur hvernig maður ætti að setja seríuna inn í en það stóð bara ekkert um það í leiðbeiningunum... veit um að sumir hefðu bara sleppt því að setja hana í en mér finnst hún einmitt gera svo mikið :)

  

Ég var alveg komin með ógeð af því að sauma allar þessar litlu fígúrur sem maður hengir yfir dagana... ég bara þurfti að setja mér markmið og sauma eina fígúru á dag til að klára dagatalið ;)

Amma mín saumaði mikið af svona pallíettu jólaskrauti og er þetta að mínu mati fallegasta jólaskrautið en hún gerir ekki mikið af þessu í dag þar sem sjónin er farin að daprast. Ég á svolítið frá henni en hún saumaði og saumaði og gaf fjölskyldunni, bæði börnum og barnabörnum... og svo smitaði hún mig af þessari bakteríu... enda elska ég allt sem glitrar ;) Kannski ég skelli líka fljótlega inn mynd af jólapóstpokanum sem hún gerði... hann er svo hrikalega fallegur.

Ef ykkur langar til að prófa að sauma svona út þá mæli ég með því að byrja ekki á svona stóru stykki... fínt að byrja á jólasokk sem er með frekar stórum hlutum... ég amk fékk alveg nóg af því að sauma allar litlu fígúrurnar sem maður hengir yfir dagana... svo mikið nóg að ég hef ekki getað hugsað mér að taka upp saumanálina og fara að sauma fleiri jólasokka sem ég á þó nokkrar pakkningar af ;)

Hekluð stjörnuljós

Ég elska að hekla og ég elska ljósaseríur... þar af leiðandi þá hannaði ég þessa ljósaseríu. Ég er dálítið hrifin af fjólubláu þannig að litavalið var ekki erfitt en ég gerði nokkrar tilraunir áður en ég endaði á stjörnunum :)

Ég nota einband í stjörnunar en ég er svolítið hrifin af ull utan um ljósaseríur þar sem það kveiknar ekki í ullinni heldur sviðnar hún (samt spurning hvort að það sé eins þegar kominn sykur á). Samt sem áður þá tek ég alltaf ljósaseríur úr sambandi þegar ég fer að sofa eða er ekki heima :) En nánar um stjörnuljósin hér eru nokkrar myndir af þeim...

 

 

 

 

Ég elska skuggana sem koma af stjörnunum... finnst ykkur þeir ekki flottir? :)

Ég stífði stjörnunar úr sykurvatni en ég er dálítið bráðlát því að stjörnurnar eru ekki enn orðar fullstífar... reyndar verður einbandið ekki glerhart en þó mun stífari en þær eru núna :) Ljósaserían er með 10 ljósum og er ég bara búin að setja 5 stjörnur á seríuna en hinar sem upp á vantar eru enn blautar. Ég reyndar vil setja þær upp á seríuna áður en stjörnunar fullharðna svo að ég verði ekki í erfiðleikum með að koma þeim upp á perustæðið. Svo læt ég seríuna hanga á standlampa þannig að stjörunar beyglist ekki :)

Skelli hérna inn myndum af stjörnunum í stífingu líka... ég hefði kannski mátt títa stjörnurnar meira niður til að fá þær jafnari en ég lenti í títuprjónahallæri... enda þarf þetta ekki að vera svo fullkomið ;)



Ég mun örugglega bæta við fleiri myndum þegar serían er orðin tilbúin... þannig að ég mun kannski skipta þessum út  :)

Garn: Einband
Heklunál: 3,5 mm
Uppskrift: upp úr mér

Hekluð jólahjörtu

Nú er akkúrat mánuður til jóla... og þá þýðir það að það styttist í prófin hjá mér :/ En það þýðir líka að maður er aðeins farinn að hugsa til jólanna...

Þar sem ég er með nokkur ókláruð verk m.a. teppi þá leyfi ég mér ekki að byrja á einhverjum stórum verkefnum fyrr en ég klára amk eitthvað af þessum sem ég er með ólokið. Það er t.d. alveg tilvalið að hekla nokkur jólahjörtu. Það eru til margar uppskriftir af hekluðum hjörtum en þetta fannst mér einstaklega fallegt... já bara fallegasta hjarta sem ég hef séð :)

Ég fann í garnskápnum mínum (ég eins og svo margir forfallnir heklarar og/eða prjónarar eigum til að sanka svolítið að okkur garni) fallegt rautt heklugarn (man ekki einu sinni hvað ég ætlaði að gera úr því þegar ég keypti það... kannski voru það jólabjöllur?) þannig að ég gat bara byrjað að hekla um leið og ég rakst á hjartað. Þar sem garnið er fínt og heklunálin líka þá voru hjörtun frekar lítil og sæt enda finnst mér ekki gróft garn ekki henta eins vel í svona dúllerí. Ég er núna búin með fimm hjörtu og bíð þess að þau fullstífni en ég stífaði þau upp úr sykurvatni.

Garn: Marks & Kattens Merc. Bomullsgarn 12/3
Heklunál: 1,75 mm
Uppskrift: http://yarnroundhook.blogspot.com.au/2012/02/swedish-hearts-pattern-revisited.html

30.10.2013 - uppfært
Það virðist sem uppskriftin sé ekki fáanleg lengur en ég notaði wayback machine til að ná afriti af upprunalegu uppskriftinni:
http://web.archive.org/web/20130607134341/http://www.slojdmagasinet.nu/gratis_monster_virkathjarta.htm

Heklaðir ungbarna Converse strigaskór

Heklaði þessa ungbarna Converse strigaskó handa litilli rúsínu sem var að skírast í dag :) Skelli hérna inn nokkrum myndum af þeim þar sem ég átti í erfiðleikum með að velja úr þeim :)

Fannst eiginlega liturinn koma betur út þegar ég tók myndir með símanum mínum :)

Þeir eru svakalega krúttlegir en þar sem ég er haldin nettri fullkomnunaráráttu þá var ég ekki alveg 100% sátt við uppskriftina :)

Garn: Kambgarn
Heklunálar: 3,0 mm. og 4,0 mm.
Uppskrift: http://www.ravelry.com/patterns/library/crochet-baby-converse

Föndrari af lífi og sál á Pinterest

Ég eins og svo margir aðrir eru húkkt á Pinterest... ó hvað maður getur gleymt sér þarna inni í margar klukkustundir að skoða eitthvað flott og sniðugt. Pinterest er eins og myndræn korktafla á netinu fyrir þá sem ekki þekkja. Maður sér eitthvað flott eða sniðugt og getur sett það sem þú sást á þína korktöflu og svo margt annað sniðugt... endilega skoðið þetta :)

En ég sem sagt eyddi alltof löngum tíma þar inni núna áðan... ég ákvað að setja inn myndir af flest öllu sem ég hef gert og linka yfir á bloggfærslunar. Ástæðan fyrir því er að mér finnst alltaf betra þegar maður smellir á "pinnana" að maður lendi á réttum stað þ.e.a.s. þegar þú smellir á myndina að þá er linkur yfir á rétta bloggfærslu. Því miður er alltof mikið um það á Pinterest að maður þarf að leita á bloggunum að réttri færslu því að sumt fólk kann ekki eða fattar ekki hvernig á að setja inn nýja pinna :)



Ef ykkur langar til að fylgjast með Föndrara af lífi og sál korktöflunni þá getið þið smellt á þessa mynd:

 

(Einnig getið þið fylgst með öllum korktöflunum mínum hérna: http://pinterest.com/oloflilja/)