Annað Miðsumarnætursjal

Ég ákvað þegar ég heklaði fyrra Miðsumarnætursjalið að hekla annað og hafa það þá einlitt... Ég valdi litinn sem varð í öðru sæti í könnunni sem ég setti inn á Facebook síðuna þegar ég fékk aðstoð við að velja litinn á Dalíusjalið. Garnið er mjög fallegt og fínt að vinna með það og er bara mjög sátt við útkomuna :) Liturinn myndast reyndar ekkert sérlega vel en hann er svona túrkisgrænn.

Garn: Knit Picks Gloss Lace
Heklunál: 4,0 mm
Uppskrift: http://www.ravelry.com/patterns/library/midsummer-nights-shawl

Hekluð ungbarnahúfa

Heklaði loksins húfu í stíl við ungbarnapeysuna sem ég gerði í fyrra úr Þóru-heklbók... ég lenti í smá vandræðum en það var ekki tekið fram í uppskriftinni hve margar umferðir væru gerðar af mynstrinu en ég hafði ekki gert sömu litaröðun og var í bókinni.... og þar sem hún var hekluð ofanfrá þá átti ég í smá vandræðum með að raða litunum svo að röðin yrði eins og í peysunni... ég nennti ómögulega að rekja hana upp einu sinni enn þannig að hún varð bara svona en ég hefði verið ánægðari ef fyrsti liturinn hefði verið dekkri græni liturinn í stað bláa eins og í peysunni :)

Ég hafði ekki gert dúsk síðan ég var krakki og ég valdi mér hring sem var aðeins minni en talað var um í uppskriftinni en svo vissi ég ekki hve stór innri hringurinn átti að vera. Útkoman varð ansi stór og mjög þéttur dúskur... þannig að ég hef áhyggjur af því að hann verði of þungur fyrir barnið. Læt bara mömmuna dæma um það :)

Garn: Kambgarn
Heklunál: 3,5 mm
Uppskrift: Þóra - heklbók

Heklaður dúkur

Ég lét loksins verða af því sem mig hafði lengi langað til að gera en það var að hekla dúk og hengja hann upp á vegg. Ég átti tilvalið garn í þetta en ég er pínu hrifin af fjólubláu og hafði keypt það fyrir tveimur árum síðan og ætlaði einmitt í dúk... stal reyndar pínu af því um síðustu jól en þá heklaði ég barbíkjól úr því. Ætli ég hafi bara ekki verið að leita að einhverri stórri fallegri dúllu eða dúk í verkið og þegar ég fann loksins eina sem ég heillaðist af þá dembdi ég mér í verkið. Það gekk vel að hekla dúkinn en þurfti að gera hann með nokkrum hléum vegna anna.

Ég ákvað að stífa hann svo með sykurvatni þar sem ég hugsaði að ég gæti þá þvegið hann og notað sem dúk ef þetta yrði nú ekki fallegt. Ég vonaðist líka til að dúkurinn yrði glerharður en hann er það þungur að þegar ég hengdi hann upp á naglann þá bara rúllaðist upp á hann. Ég vildi nú ekki fara að negla fullt af nöglum í vegginn og brá því á það ráð að nota fullt af hvítu kennaratyggjói til að festa dúkinn upp á vegg.

Ég hengdi fyrst upp dúkinn ein og mér veitti greinilega ekki af fleiri höndum því að það varð kipringur þar sem ég hengdi hann á naglann. Það pirraði mig pínu og þar sem ég er haldin pínu fullkomnunaráráttu þá auðvitað lagaði ég þetta og tók nýjar myndir þegar ég hafði fleiri hendur til að hjálpa mér ;)

Garn: Mandarin heklegarn
Heklunál: 2,0 mm.
Uppskrift: http://crochetartblog.blogspot.com/2013/04/crochet-round-doilies-crochet-lace-free.html

Bolagarn - garn gert úr stuttermabol

Var að búa til garn úr stuttermabol og ákvað að taka myndir til að leyfa ykkur að sjá hvernig ég geri þetta en ég notaði það þegar ég heklaði hitaplattann úr stuttermabol.

Efni og áhöld:
Lúinn stuttermabolur sem hættur er í notkun (bestir eru bolir sem eru saumalausir í hliðunum), góð skæri til að sníða með.

Byrjum á því að klippa þvert yfir bolinn undir höndunum og klippa af faldinn neðst.

Brjótið bolinn svo saman þannig að önnur hliðin er lögð upp að hinni en ekki alveg gott að hafa ca. 2 cm bil. Svo er klippt upp í bolinn þvert með ca. 2,5 cm bili en passið að klippa ekki alveg þvert yfir því að hin hliðin er notuð til að gera þetta að samfeldri lengju.

Þegar búið er að klippa upp í bolinn þá er best að fletja út óklipptu röndina og klippa skáhalt á milli ræmanna. Þannig fæst löng samfeld ræma.

Að lokum er farið yfir allt garnið og teygt svolítið á því og þá rúllast það aðeins upp og hægt að vinda það svo upp í hnykil.

Ef  þið viljið skeyta saman og hafa t.d. garnið úr fleiri bolum eða þurfið að klippa þvottamiða af, þá er klippt smá gat á sitthvorn endann.

 

Þá er endanum af viðbótinni stungið undir og í gegnum endann á garninu, og svo viðbótargarnið dregið í gegnum gatið á viðbótinni.

 



 

Svo er togað varlega og þá er búið að skeyta garninu saman.

 



Gott er að vinda svo garninu upp í hnykil... og þá er ekkert að vanbúnaði að fara að hekla eitthvað úr því.

P.S. Bolurinn er hreinn en það er fast kítti í honum :)

Hekluð snyrtibudda

Heklaði buddu utan um snyrtidótið mitt... rakst á fallega og mjög einfalda uppskrift sem hentar vel byrjendum :)

Ég reyndar eins og svo oft áður fer ekki alveg 100% eftir þeim en ég gerði hana t.d. bara eins stóra og mig langaði til og svo var hekluður hnappur en ég kom honum nú ekki í gegnum gatið og fann mér því bara sæta tölu í staðinn... miklu flottara :)

Mér fannst garnið afskaplega fallegt og það er blár glitþráður í því... en mér þykir samt afskaplega leiðinlegt að vinna með akrílgarn... það einhvern veginn rispar svo á mér puttana sérstaklega þumlana.

Garn: Kartopu Kar-Sim
Heklunál: 3,5 mm.
Uppskrift: http://www.ravelry.com/patterns/library/perfect-purse

Dalíusjal

Þá er ég búin með fyrsta sjalið úr Knit Picks garninu. Ég var lengi búin að slefa yfir Dahlia Shawl en það er eftir sama hönnuð og gerði uppskriftina af Miðnætursumarsjalinu. Þannig að ég var ekkert í vafa hvað yrði fyrsta sjalið sem ég myndi hekla úr garninu sem ég keypti... eina sem ég átti í erfiðleikum með var að velja litinn. Ég fékk hjálp við litavalið á Facebooksíðunni (endilega líkið við síðuna því að ég set stundum eitthvað skemmtilegt þar inn sem ekki ratar á bloggið) og varð þessi skæri limegræni litur fyrir valinu (verst hvað hann myndast illa).

Ég bað manninn minn þegar hann kom úr vinnunni að taka eina mynd af mér með sjalið til að sýna hversu stórt það er :)

Ég var frekar fljót að hekla sjalið enda er mynstrið alltaf eins nema eina sem breytist er byrjunin, miðjan og endirinn í hverri umferð :) Ég lenti í engum erfiðleikum með uppskriftina en ég las hana ansi lítið enda þykir mér best að hekla bara eftir teikningum sé það í boði. Ég gerði mitt heldur stærra en segir í uppskriftinni.

Það var svolítið puð að strekkja sjalið og það er algjört möst að eiga nóg af títuprjónum því að nóg er af dúllerí sem maður þarf að títa niður.

Garn: Knit Picks Shadow Tonal
Heklunál: 4,0 mm.
Uppskrift: Dahlia Shawl

Falleg hekluð taska með blómum

Ég rakst á svo fallega tösku á einni síðu á netinu... svo fallega að ég varð bara að gera eina svipaða :) Ég var svo ástfangin af henni að ég leitaði mikið að einhverjum upplýsingum og rakst á síðu þar sem var linkur á uppskrift af blómunum og myndband á youtube... eini gallinn var að þetta var á portúgölsku.

Hér eru svo myndir af afrakstrinum og ég bara segi það grínlaust að þetta er fallegasta heklaða taska sem ég hef séð.

Mamma mín kom í heimsókn ásamt fjölskyldunni í gær og hún bara saumaði fóðrið (í stað þess að hjálpa mér) enda er hún snillingur á saumavélinni ólíkt mér :) Efnabúðin hérna var lokuð en ég átti efni sem ég keypti fyrir 10 árum síðan og ætlaði að sauma gardínur úr (bjó annars staðar þá) og liturinn passaði einstaklega vel við þannig að það reddaðist, þá átti ég ekki til rennilás og maðurinn minn renndi í næsta bæjarfélag til að redda því og svo var góð kona sem reddaði mér smellulásnum... allt þetta varð til þess að taskan kláraðist í gærkvöldi eftir auma putta við að sauma fóðrið við töskuna :)

Ég viðurkenni alveg að ég eyddi miklum tíma í að finna út úr þessu og þurfti að rekja nokkrum sinnum upp. Byrjaði fyrst og fannst eins og hún yrði svo lítil að ég rakti upp, svo notaði ég garnið tvöfalt og þá fannst mér taskan verða alltof stór og á endanum varð hún eins og ég vildi.

Þannig að það er í raun engin uppskrift en ég setti samt linkinn á uppskriftina á portúgölsku sem ég byggði töskuna mína á ef einhverjir vilja spreyta sig á henni :)

Garn: Mandarin classic
Heklunál: 3,0 mm. og 3,5 mm.
Uppskrift byggð á: http://www.mimosdacin.blogspot.com/2011/12/bolsa-fat-bag-areia.html