Vorsjal

Strax eftir að þriggja vikna verkefninu var lokið í skólanum í vor þá brunaði ég í Handprjón og keypti mér þetta garn í tilefni þess að nú væri ég komin í sumarfrí og nú gæti ég sko farið að gera eitthvað!

Ég fann fljótlega uppskrift af sjali sem mig langaði til að gera... já ég er pínu sjal-óð... enda er svo svakalega gaman að hekla sjöl :)

Ég kláraði sjalið í lok maí... en ég var ekki nógu sátt við kantinn... þannig leið og beið þar til í gær þremur mánuðum seinna að ég bullaði einhvern kant og var bara nokkuð sátt... en þetta er eiginlega orðið haustsjal í stað þess að vera vorsjal ;)

 

 

Fín uppskrift að öðru leyti en að mér fannst hún óljós á köflum.

Garn: Randalína II / Evilla Artyarn 8/2
Heklunál: 3,5 5,0 mm.
Uppskrift: http://www.ravelry.com/patterns/library/woollen-spring-shawl-varschal-i-ylle

Hekluð og stífð blóm á ljósaseríu



Nú er kertaljósatíminn aftur runninn upp og þar sem ég er dálítið hrifin af ljósaseríum til að lífga upp skammdegið þá heklaði ég þessi blóm og setti á seríu.

Ég heklaði blómin úr appelsínugulu einbandi og notaði sykurvatn (50/50 hvítur strásykur leystur upp í sjóðandi vatni). Ég lét þau liggja í vatninu í smá stund, svo tók ég þau upp og vatt þau aðeins og svo títaði ég þau niður á plast (myndi mæla með því að setja plastfilmu ofan á plastið þar sem blómin vildu aðeins festast við).

Svo var bara að bíða eftir að blómin þornuðu. Þar sem ég ætlaði að setja þau á ljósaseríu þá þorði ég ekki að bíða eftir að þau fullhörðnuðu þannig að á ég smellti þeim á seríuna og lét hana svo hanga  þar til þau voru tilbúin. Hér má svo sjá nokkrar myndir af útkomunni:

Blómin eru aðeins aðlöguð því að í uppskriftinni var ekki gert ráð fyrir að þau væru sett á ljósaseríu, en uppskriftina af þeim má finna í bókinni 100 Flowers to Knit & Crochet.

Garn: Einband
Heklunál: 3,5 mm

Lufsur

Loksins get ég heklað í einhverjum öðrum lit en bleikum! Sat og heklaði Lufsur úr Þóru heklbók fyrir framan sjónvarpið í gærkvöldi... en þar sem músarskórnir mínir voru orðnir ansi lúnir þá vantaði mig eitthvað fyrir kaldar tásur ;)

Uppskriftin var fín fyrir utan smávægilegar villur m.a. garnþörfin en í þessar fóru rétt rúm ein dokka en ekki 3 eins og uppgefið var í uppskriftinni. Ég nennti ekki frekar en fyrri daginn að gera heklfestuprufu en ég heklaði stærð M og þær smellpassa og ég nota skó nr. 39… mér ætti ekki að verða kalt á tánum á næstunni :)

Garn: Álafosslopi
Heklunál: 7,0 mm

Uppskrift: Þóra heklbók

Það sem ég hef verið að bardúsa

Loksins blogga ég... en núna um helgina er Sumar á Selfossi og ég er búin að hengja upp það sem ég hef verið að gera :)

Ég auðvitað heklaði utan um skyrdósirnar og graffaði á snúrustaurinn og hafði það í hverfislitnum mínum... en svo bættist þetta við...

Heklaði blóm úr einbandi og hengdi á ljósaseríu

Hér sést betur hvernig blómin eru

Heklað hjartagraff úr tvöföldum bleikum plötulopa

Heklað graff úr tveimur litum af plötulopa og dúllerí úr einbandi

Svo er það stóra graffið...

... heklað úr tvöföldum plötulopa...

... og blómin úr léttlopa

Ég var ansi lúin og loppin þegar ég var búin að sauma þetta stóra stykki á staurinn... hefði betur byrjað á því en ekki endað... mér fannst saumurinn vera frekar ljótur þannig að ég saumaði fleiri blóm á hann þannig að fólk kannski hefur þá eitthvað annað að glápa á en sauminn ;)

Fleiri heklaðir blómapottar

Ég er eitthvað löt þessa dagana... það koma alveg dagar þar sem ég hvorki hekla né prjóna... er búin að vera á þvælingi í sumarfríinu ;) Annars er ég með tvö sjöl í gangi þar sem ég á bara kantinn á þeim eftir... reyndar er annað með kanti en mér fannst hann ekki nógu flottur þannig að ég er að bíða eftir hugljómun... svo er ég með lopapeysu á eina frænku á prjónunum og gríp í hana annað slagið og svo er ég búin að vera að hekla svolítið bleikt fyrir Sumar á Selfossi sem verður 11. ágúst... ætla ekki að skella neinum myndum inn af því fyrr en þá :)

Ég ákvað að skella inn myndum af þremur blómapottum í öðrum litum en bleikum... ég ætlaði að vera búin að hekla miklu fleiri því að góð vinkona reddaði mér svo mörgum tómum skyrdósum... en ég týndi heklunálinni sem ég notaði og var bara að finna hana... auðvitað hafði ég stungið henni inn í einhverja garnhnotu ;)

Ég þarf að hekla utan um fleiri því að ég á enn nokkur blóm í skyrdollum... ég er svolítið skotin í sumarlegum litum þessa dagna og finnst svolítið gaman að hafa fleiri en einn lit... reyndar held ég að ég nenni ekki að ganga frá svona mörgum spottum þannig að ég held að tvílitt sé málið ;)

Heklað utan um skyrdós - uppskrift

Ég ákvað að hripa niður hvernig ég geri pottana þar sem nokkrir voru að biðja um uppskrift... amk svona gerði ég mína blómapotta en auðvitað getur verið að einhverjir aðrir hekli fastar eða lausar en ég :) Þegar ég var búin að hekla og setti utan um dósina þá náði heklið ekki alveg upp á brún en þegar ég hengi pottana með blómi í upp á krókinn þá strekkist á og þá nær heklverkið alveg upp að brúninni á dósinni.

Efni og áhöld:
Garn mandarin petit, heklunál 3,5 mm, javanál til að ganga frá endum, stór skyrdós, hvítt málningarsprey (sem tollir á plasti), krókur og/eða naglar.

Aðferð:
1. umf. 4 loftlykkjur (ll) sem telst sem fyrsti stuðull, 11 stuðlar (st) í fyrstu ll. Tengja með keðjulykkju (kl) í 4 ll. Samtals 12 stuðlar.

Í öllum umferðum sem koma á eftir þá fer ég til skiptist með 1 kl áfram eða 1 kl aftur á bak þannig að samskeytin verða á sínum stað :)

2. umf. kl, 4 ll, * st, ll* (endurtaka út umferðina það sem er á milli * *) tengja með kl í 3 ll.
3. umf. kl, 4 ll, st, ll í sama loftlykkjuboga (llb), *st, ll, st, ll* í hvern loftlykkjuboga. Tengja með kl í 3 ll.
4.-6. umf. kl, 4 ll, * st, ll* í hvern llb. Tengja með kl í 3 ll.
7. umf. kl, 4 ll, * st, ll* í hvern llb, ll. Tengja með kl í 3 ll.
8.-13. umf. kl, 5 ll, * st, ll* í hvern llb, ll. Eyk út því að dollan er ekki bein. Tengja með kl í 3 ll.
14. umf. ll, fastalykkjur (fl) í hverja lykkju nema í lokin þrengdi ég um eina. Tengja saman með kl. Samtals 47 fl.

Klippa enda (hafa smá spotta) og ganga frá endunum þannig að þræða spottann svona tvo hringi utan um gatið á samskeytunum.

Ég (reyndar maðurinn minn) setti upp krók á skjólvegginn og hengdi blómapottinn á en mér fannst þetta vera á fleygiferð í roki þannig að maðurinn minn setti tvo nagla sitt hvorum meginn neðst við pottinn... og ég er að vonast til þess að potturinn verði kyrr... annars væri líka möguleiki að hengja pottinn upp á tvo króka :)

Heklaðir blómapottar ofl

Mér finnst alveg svakalega gaman að geta endurnýtt hluti... s.s. eins og að hekla utan um krukkur. Ég ákvað að hekla poka utan um risa sjampó- og hárnæringarbrúsa til að hengja upp í útisturtunni og þá kviknaði hugmynd...

... ég var búin nefnilega að þræða blómabúðirnar að leita að blómapottum til að hengja utan á skjólvegginn hjá mér en hafði ekki fundið neitt nema að ég sá eina bastkörfu sem kostaði 7 þúsund kall og ég hefði þurft nokkrar... þess vegna er ég alsæl með þessa brilljant hugmynd mína en ég ákvað að hekla utan um skyrdósir.... slæ margar flugur í einu höggi... spara pening, næ að endurnýta hluti og skreyti í leiðinni fyrir Sumar á Selfossi sem verður í ágúst :)

Ég ákvað að hafa heklið mjög einfalt og fljótlegt því að ég ætla að hengja amk 10 svona blómapotta á skjólveginn hjá mér... þannig að ég þarf að borða mikið skyr á næstunni ;) Ég spreyja dósirnar hvítar því að heklið er svo gisið og hengi þá upp á króka :) Takið líka eftir flotta húsnúmerinu sem ég föndraði eitt sinn ;)
Garn: Mandarin petit
Heklunál: 3,5 mm